Татарстанда ятим балаларга 352,6 миллион сумга 250 фатир сатып алу планлаштырыла. Бу мәгълүмат Дәүләт сатып алулары сайтында чыкты.
«Ятим һәм ата-ана тәрбиясеннән мәхрүм калган балаларга, Татарстан Җир һәм мөлкәт мөнәсәбәтләре министрлыгы кирәге өчен торак биналар сатып алу. Башлангыч бәя: 352 602 257 сум», диелгән документта.
Казан, Түбән Кама, Әлмәт, Теләче, Чистай, Саба, Тукай, Актаныш, Апас һәм Чирмешән районнарында фатир сатып алыначак. Норма буенча фатирның мәйданы 24 квадрат метрдан аз булырга тиеш түгел.
Фатирлар 20 декабрьгә кадәр сатып алыначак.
