Татарстанның ике вәкиле — Роза Булатова һәм Гөлнара Сираҗиева –Ростов Донда узган «Миссис Россия International-2020» илкүләм конкурсының ике төп таҗын алды. Бу хакта Булатова үзенең Instagram битендә хәбәр итте.
Роза Булатова «Миссис Россия Планета-2020» титулын яулады. Ул Болгариядә узачак Халыкара конкурста Россия данын яклаячак.
Гөлнара Сираҗиева «Гранд миссис Россия International-2020» титулына ия булды. Хәзер ул Россияне АКШтагы халыкара конкурста тәкъдим итәчәк.
«Миссис Россия International-2020» конкурсында Кырым Республикасыннан Анастасия Божова җиңүче булды.
/Татар-информ
