Иртәнге аш өчен боткадан да әйбәтрәк ризык юк. Көн дәвамына җитәрлек энергия бирә, шул ук вакытта ашкайнату системасына да авырлык китерми. Сүзебез – йөрәк-кан тамырлары өчен иң файдалы боткалар турында.
Файдалы үзенчәлекләре
Ботка – организмны озак кына энергия белән тәэмин итеп торучы “әкрен” углеводлар ул. Тоз салмыйча гына, суда пешерелгән ботка ашап, “бушану” көннәре (2-3 көн) үткәргән кешенең эчәклекләре бик әйбәт эшли башлый һәм йөз-кыяфәте дә яхшыра.
Ботка ярдәмендә эч кибүдән дә котылырга мөмкин. Ярманы даими куллану яман шеш килеп чыгу куркынычын чама белән 20 процентка киметә.
Ярма – ябыгырга теләүчеләр өчен дә менә дигән продукт. Матдәләр алмашын бик нык яхшырта чөнки. Ашказаны авыртучыларга исә бөтенләй дә боткадан яхшырак ризык юк: тышчасын каплап, авыртуны басарга ярдәм итә ул.
Солы боткасы
Организм өчен бик кирәкле клетчаткага (эчәкләрне шлаклар һәм токсиннардан чистарта) бай. Солы шулай ук канда холестерин микъдарын киметеп, аның утырмаларын тарката. Боларның барысы да кан тамырларын ныгытуга китерә. Моннан тыш солы боткасы озак вакыт буе канда шикәр микъдарын тиешенчә тоту-саклау мөмкинлеге бирә. Димәк, шикәр чирен булдырмас өчен дә менә дигән чара.
Карабодай боткасы
Калориясе күп булмаса да, клетчаткадан торуы карынның тиз генә ачыкмавына китерә. Карабодай боткасы, “овсянка” кебек үк, канда шикәр һәм холестерин микъдарын нормада тотуга ярдәм итә. Моннан тыш андагы минераллар һәм витаминнар нерв системасын, йөрәк-кан тамырларын ныгыта. Мөһим үзенчәлеге – тимергә (гемоглобин өчен кирәк) бай булуы. Карабодай кан тамырларын бик яхшы чистарта. Моның өчен ярманы төнгә кефирга салып калдырырга һәм иртән ашарга кирәк.
.
Дөге боткасы
Гадәттә без чистартылган-шомартылган дөге сатып алырга тырышабыз. Чынында чистартылмаган коңгырт дөге файдалырак. Сәнәгатьтә җиңелчә генә эшкәртелүе сәбәпле, мондый дөгедә файдалы үзенчәлекләре күбрәк сакланып кала.
Дөгенең уникаль үзенчәлеге – ул да булса кандагы протеинны киметүче матдәдән торуы. Ярманың файдасы атеросклерозны (артериаль кан тамырларына зыян килүне аңлата) һәм кан басымы күтәрелүне кисәтү-булдырмаудан гыйбарәт.
Тары боткасы
Канда холестерин һәм глюкоза микъдарын көйләргә булыша. Ярмада калий матдәсе күп. Ә ул кан басымын нормада тотуга, кан тамырларын чистарту, ныгытуга ярдәм итә.
Кукуруз боткасы
Организм өчен бик кирәкле антиоксидантлардан (бигрәк тә селен күп) тора. Селен картаюны тоткарлый, йөрәк мускулларын озак еллар буе яшь һәм сәламәт килеш саклауга ярдәм итә.
Тикшеренү нәтиҗәләреннән күренгәнчә, кукуруз ярмасын даими куллану гипертония килеп чыгу куркынычын бермә-бер киметә.
Арпа боткасы (перловка)
Телгә алып үтелгән боткаларның һәммәсе кебек үк канда холестерин микъдарын көйли. Төп аермасы – анда йөрәк-кан тамырларын сәламәт тотуга җавап бирүче витаминнар, магний һәм тимер микъдары күпкә зур.
Ботканы даими куллану кан тамырларында тромблар һәм холестерин төерчекләре килеп чыгу куркынычын киметә.
Фото: pixabay.com
