Ничек кенә тырышмасын, руль артына утырганнар юл йөрү кагыйдәсен бозмый гына йөри алмый. Кайбер вакытта шундый «шуклык»лар өчен «сәлам хатлары»н алырга туры килә. Сәхифәбез кунакларын үзләрен нинди машина йөртүче дип саный? Штрафлар еш түлиләрме? Шул сорауларны үзләренә бирдек.
Гөлнара Җәлилова, шагыйрә, журналист:
– 18 яшемдә «права» алдым. Әмма шундук машинага утырмадым, ул бит әле яшь чак, студент чак. Рульдә йөри башлаганга 14–15 еллап бар. Кагыйдәләрне бозып йөрисезме дигәннән, бер мәртәбә булды ул. Өстә эленеп торган турыга, уңга-сулга борылышны күрсәткән билгеләр бар бит әле, мин менә шуңа карамыйча, юлда ясалган разметкага гына карап, сулга борылып киттем. Казанда булды бу. Шундук туктаттылар. Әмма мин хәлемне аңлаттым, юлда да разметка бар икәнен әйттем. Штрафлар килгәне юк. Тизлекне арттырып, «шумахерланып» очып йөргәнем юк. Машинаны адекват йөртәм дип саныйм. Кайбер вакытта башка машина йөртүчеләргә карап бик үк тәртипле дә булып бетеп булмый. Юлда кайберәүләр тәртипсез кылана, андыйларны урынга утырта белергә кирәк. Сигнал биреп, узып та китә алам. Юл – уйнап йөри торган урын түгел. Анда мин-минләнергә ярамый. Исән-имин йөрик.
