ТикТокта сәясәт: Навальный балаларга кул суза, аларны саклыйк!

«Нәрсә ул начар, нәрсә ул яхшы?» Маяковскийның бу шигырен искә төшерер чак җитте бугай. Уйлап карагыз әле, балаларыгыз белән бу хакта кайчан соңгы тапкыр сөйләштегез?

«Мәктәптә хәлләр ничек?» йә «Ашадыңмы?» дигән дежур сораулардан кала, үсеп килгән балаларыбыз белән еш сөйләшәбезме? Юк, чөнки алар – социаль челтәр балалары. Яхшы бит, аптыратмыйлар, игътибар таләп итмиләр (Хәер, без, өлкәннәр тормышын да Инстаграм йотып бара бугай инде).
Ә безнең балалар интернетта күптән инде майнкрафт кына уйнап утырмый. Аларның үз социаль челтәрләре – ТикТок бар. Анда үз дөньялары, үз кумирлары. Америка җырчысы Билли Айлиш, рус эстрадасы феномены Моргенштерн гына да карап утырмыйлар, сәясәт белән дә кызыксыналар икән. ТикТок мәйданындагы сәяси бушлыкны оппозиционер Навальный колачлап алды да, безнең балалар бер мәлдә «Навальный балалары»на әйләнде дә куйды.

Ә бу үз мәнфәгатьләрен кайгыртучылар өчен менә дигән җирлек булды. Оппозиционерлар түләнгән блогерлар (аларның күбесе Россиядә яшәми, йә беренче мөмкинлек чыгуга илдән сызачак) аша үз идеяләрен алып бара, үсмерләр берсүзсез ышана, чөнки алар – әле язылмаган ак кәгазь, җитмәсә, күп нәрсәне аңлап бетерми. Илне болгатырга теләүчеләр бала күңеле белән уйный. Россия буйлап санкцияләнмәгән митингка чакыру да, нигездә, ТикТокта бара.

Митинг турында күп ата-аналар нәкъ менә балаларыннан ишетә. «Навальный төрмәдә утыра, Путин утырмый, Навальныйны жәллим. Ул бит Россиядә яхшы тормыш урнаштырырга тырыша», – дип әйтә башлады үсмер кызым. Моны игътибарсыз калдыра алмадым: «Ул ничек үзгәртәчәк, нәрсә булачак соң?» – дигән соравым җавапсыз калды да утырып сөйләштек.

Үзгәртәм диючеләр күп булыр ул… Менә шуларның берсе өчен безнең балалар – сарык көтүе. Уйлап карасаң, Навальный вакыйгасы – алдан ук уйланылган ювелир режиссер эше. Оппозиционерлар аңлый: башында акылы булганнарны урамга алып чыгып булмый. Җитмәсә, өлкәннәрнең хәзерге көн белән чагыштырыр вакыты булды. Ә менә балалар ул вакытларны белми. Алар тагын да матур тормыш тели. Шуңа күрә дә оппозиция нәкъ менә балалар аудиториясен сайлый. Балаларыгыздан сорап карагыз әле, бу көннәрдә ТикТокта нәрсә популяр? Дөрес, Навальный һәм митинг дигән җавап ишетерсез.
Махсус кайтып төрмәгә ябылулар (Навальный өчен бу көтелмәгән хәл иде дип, бәхәскә керүчеләр булмасына иманым камил!), нәкъ шушы вакытта хәзерге хакимияткә каршы видео чыгару, аның хакында көне-төне ТикТокта сөйләп, урамга чыгарга өндәү. Болар барысы да уйланылган, чөнки әлеге социаль челтәрләрдә өлкәннәр түгел, балалар, яшүсмерләр утыра.

«Мин митингка чыгам», – дип кайткан балалар күп булгандыр бу көннәрдә. Кайсыдыр үсмер Навальный сәясәтен яклап, кайсысы кызык эзләп йөреп кайтырга карар кылган. Навальный планы шуннан гыйбарәт тә: урамга балаларны алып чыгу. Аларга фикер тагу җиңел, аларга адреналин, драйв кирәк, мәзәк! Ә иң мөһиме: гормоннары уйнаган үсмерләргә үз сүзләрен әйтергә мәйдан барлыкка килә. Бөтен дөньяга, ата-аналарына, җавапсыз мәхәббәтләренә җыелган үпкәләрен менә шушы мәйданда чыгара алачак алар. Ә бу үсмерләр психологиясен белгән технологларга кулай.

«Балалар митингы» кан коешка әйләнәчәк. Монысы да – алдан уйланылган план. Урамга чыккан өердә махсус провокация булачак. ОМОН, полиция балаларны сөйри башлаячак (ә алар чын полиция хезмәткәре булыр микән?). Иң фаҗигалесе шул: берәр баланы үтерүләре дә ихтимал. Чынлап! Оппозициягә бер бала (бәлки, берничә бала) җанын кыю берни тормый, аларның – үз мәнфәгатьләре. Менә шушында теге планның төп өлеше эшли башлаячак. Балаларын кыерсытканнарын күреп, халык күзен кан баскан җанварга әйләнәчәк һәм хакимияткә ачуы ташыганнар урамга агылачак. Кан коеш башланачак. Анда гражданнар сугышына да барып җитәргә мөмкин… Ә сугыш ул – һәрвакыт куркыныч һәм фаҗига! Тарихка күз салыйк: сугышта бары тик гади халык кан койган, патшалар түгел. Хәзер дә шулай булачак. Ә гади халык ул – без. Өстерүчеләр читтән карап кына майга ут өстәп торачак. Без һәм безнең балалар оппозициягә нәкъ менә шуның өчен кирәк. Алар халыкка матур тормыш бирү турында хыялланмый. Максатлары – яңа зиннәтле сарайлар, илкүләм байлыкны кулга төшерү.

Навальный планы яңалык түгел. Әлеге куркыныч алым барлык төсле революцияләрдә кулланылды. Дөрес, анда да баррикадага яшьләр чыкты. Алар белән рәхәтләнеп идарә иттеләр: суктылар, үтерделәр… Ә Навальный изге җаннарга – балаларга кул суза. Ике дә уйламыйча һәм жәлләмичә аларны каток астына салып таптатырга тели. Идеаль булмаган Путин сәясәтеннән туеп, яңа хакимият турында хыялланучылар! «Яңа Россияне» башсыз үсмерләребез түгел, алар каны өстендә оппозиция төзеячәк. Сезгә шул кирәкме? Һәм сез яңа Россиядә пенсия артыр дип ышанасызмы?

Чулпан Галиәхмәтова

Фото: pixabay.com