Машинабызны бер йорт тирәсендә төнгә калдырган идек. Иртән өстенә түбәдән кар төшкән. Машинабызга ремонт кирәк хәзер. Мондый очракта кемгә мөрәҗәгать итәргә?
Рузилә, Казан
Сорауга юрист Рәзил Бильданов җавап бирде:
– Иң элек кар төшкән бина өчен җаваплы кешеләрне табарга кирәк. Идарәче оешмага карыйммы ул, шәхси милекме – шуны ачыклыйсы. Аннары инде әлеге урынга участок полициясен чакырып, булган хәлне документлаштырырга кирәк. Машинага килгән зыянны фото һәм видеога да төшереп алыгыз. Түбәдәге кар өчен җавап бирүче кеше табылса – зыянны аннан түләтергә була. Әгәр ул риза булмаса, судка мөрәҗәгать итәргә кирәк. Әмма аңа кадәр килгән зыянны раслатыр өчен экспертиза ясатырга да онытмагыз.
