Якын көннәрдә Казанга Төньяк Атлантикадан циклон киләчәк. Бу хакта «Татар-информ» мәгълүмат агентлыгында узган матбугат конференциясендә КФУ галимнәре кисәтте.
«Хәзер без Төньяк Атлантикадан килгән циклон йогынтысында торабыз. Киләсе атнада шәһәрдә җылы булачак. Чираттагы циклон явым-төшемнәр алып киләчәк. Алдагы ике көндә Казанда айлык явым-төшем нормасының өчентән бере күләмендә кар явачак», — дип хәбәр итте КФУ профессоры, география фәннәре докторы Юрий Переведенцев.
Аның мәгълүматларына караганда, хәзер Казан өчен тәүлеклеклек температура нормасы -13 градус булырга тиеш, тик чынлыкта ул — 4-5 градус тирәсендә тора.
КФУның Экология һәм табигатьтән файдалану институтының метеорология, климатология һәм атмосфера экологиясе кафедрасы доценты Тимур Әүхәдиев «җомга көнне явым-төшемнәр күләме 10 мм дан артык булуы көтелә», дип өстәде. Әгәр фараз расланса, атна ахырына инде шәһәрдә кар катламы 58дән 68 см га кадәр артачак.
