7 март төнендә Хакасиядә 5 балалы гаилә яши торган йортта янгын чыккан. Тикшерү комитеты хәбәр итүенчә, гадәттән тыш хәлдә ике бала һәлак булган, тагын өч бала һәм аларның әнисе хастаханәгә салынган.
Фаҗига Черногорск шәһәрендә төнге икенче яртыда була. Төтен исенә гаилә башлыгы уяна. Ул бөтен гаиләсен урамга алып чыга, ашыгыч ярдәм чакырта. Хатын белән биш баланы табиблар кичекмәстән хастаханәгә илтергә ашыга. Әмма 5 яшьлек кыз белән 9 яшьлек малайны коткарып кала алмыйлар, алар «ашыгыч ярдәм» машинасында үлә. 3, 7 һәм 12 яшьлек өч баланы әниләре белән хастаханәгә салганнар. Әлеге гаилә әгъзаларының хәле турында төгәл мәгълүмат юк. Тикшерү комитеты «ике затка саксызлык аркасында үлем китерү» маддәсе буенча җинаять эше кузгаткан. Тикшерүчеләр криминалистлар белән берлектә фаҗига урынында эшлиләр. Башлангыч мәгълүматлар буенча, янгын кесә телефонын зарядкага куйган розеткаларның берсе янында чыккан.
