Диңгезчеләр көне
Бу бәйрәм 1996 елның 15 июлендә Хәрби Диңгез Флоты баш командующие боерыгы белән гамәлгә кертелә. Әлеге дата очраклы гына сайланмаган. 1906 елның 19 мартында хәрби флот суднолары классификациясенә беренче тапкыр 10 су асты көймәсе кертелә.
Ашыгыч ярдәм
123 ел элек (1899) Петербург шәһәрендә Россиядә беренче тапкыр «Ашыгыч ярдәм» станциясе ачыла. Аңа кадәр урамда зыян күргән кешеләрне полицейскийлар, янгын сүндерүчеләр, хәтта извозчиклар җыеп йөргән. Аларны полиция каршындагы махсус йортларга илткәннәр. Беренче 5 «Ашыгыч ярдәм» станциясе хирург Николай Вельяминов инициативасы белән ачылган. Аларның һәрберсе икешәр экипаж, дүрт пар носилка һәм башка кирәк-яраклар белән тәэмин ителгән. Станциядә 2 санитар кизү торган. Авыруларны якындагы хастаханәгә яки берәр фатирга илткәннәр.
Беренче тапкыр банкны талаганнар
191 ел элек (1831) Америкада беренче тапкыр банк талыйлар. Англиядән килгән иммигрант Эдвард Смит Нью-Йорк сити-банкында ул чор өчен зур сумма булган 245 мең долларны чәлдерә. Җинаятьчене бик тиз эләктерәләр, акчаның бер өлешен кайтаралар. Эдвард Смитны биш елга Синг-Синг төрмәсенә ябалар.
Фәния Әхмәтҗанова
