Россиядә яшәүчеләрнең күпчелеге Президент Владимир Путинның эшчәнлеген хуплый. Бөтенроссия җәмәгатьчелек фикерен өйрәнү үзәгенең (ВЦИОМ) 1 апрельгә сораштыру нәтиҗәләре шундый.
Респондентларның 79 проценты, Путинның эшчәнлеген хуплыйсызмы, дигән сорауга “әйе” дип, 13,5 проценты – “юк” дип җавап биргән. Сораштыруда катнашучыларның 81 процентының дәүләт башлыгына ышануы, 15,4 процентының – ышанмавы ачыкланган.
Сораштыруны “ВЦИОМ-Спутник” 21-27 мартта уздырган. Анда 18 яшьтән зуррак 1,6 мең кеше катнашкан. Тикшеренү телефоннан аралашу ысулы белән үткәрелгән. Белгечләр әйтүенчә, мондый ысул белән уздырылган сораштыру нәтиҗәләрендә хата 1проценттан артмый.
