Туроператорлар Төркиядә ял итүнең “кытлык товар”га әйләнүен әйткәннәр

Төркиядә ял итүгә ихтыяҗ, туристларга юлның башка илләр тарафына тулысынча диярлек ябылуы сәбәпле, нык арткан. Бу исә әлеге илдә ял итүне “кытлык товар”га әйләндереп куйган. Россия туроператорлар ассоциациясе (АТОР) шулай дип хәбәр итә.

“Башка юнәлешләргә юлның ябылуы, шулай ук самолетларның азрак оча башлавы аркасында Төркиядә ял итү “дефицит товарга” әйләнде. Инде килеп, дөньядагы вазгыятьнең тотрыксыз булуы сәбәпле күпләрнең җылы диңгез буйларында ял итү мөмкинлегеннән мәхрүм калудан куркулары һәм шуңа күрә билетларны тизрәк сатып алырга ашыгулары ыгы-зыгыны тагын да көчәйтеп җибәрә”, – дип аңлатылган ассоциациядә.
Шуның белән бергә, белгечләр билгеләп үткәнчә, очкычларның җитмәве, күп кенә илләрнең күге ябык булуы барыбер туристлар ташкынының кимүенә китерә. Июнь аенда Төркия курортларына Россиянең 17 шәһәреннән илебезнең һәм Төркиянең 8 авиакомпаниясе самолетлары оча. Чагыштыру өчен: 2019 елгы җәйге сезонда 46 шәһәрдән 18 авиакомпания туристларга хезмәт күрсәткән булган.

АТОР мәгълүматларына караганда, быел җәен Төркиягә туры рейслары булган шәһәрләр саны пандемиягә кадәрге чор белән чагыштырганда 2,7 тапкыр кимегән. Ә пассажирлар саны 55% дәрәҗәсендә калган. “Күп кенә туроператорларның Төркиягә билетлары июльнең икенче яртысына кадәрге чорга сатылып беткән инде. Туристларны бәяләрнең зур булуы да куркытмый – кытлык шартларында алар юлламаны теләсә нинди бәядән сатып алырга әзер. Ихтыяҗ тәкъдимнән күпкә артык, аеруча – самолет рейслары аз булган төбәкләрдә”, – дип аңлатып үтелгән Россия туроператорлар ассоциациясендә