Минзәләдә XIV Театрлар Сабан туе узды: тәкә – Мусага, машина – тинчуринлыларга

Узган шимбәдә Татарстандагы ун дәүләт театры артистлары үзара көч сынашты, тамашачының да күңелен күрде. 

Сабан туе театр коллективларының традицион парады белән башланып китте. Сабантуй мәйданыннан республика күләмендә танылган, тамашачыларның иң яраткан театрлары – Камал, Тинчурин, «Әкият», Кариев, Чаллы драма театры, Чаллы курчак театры, Минзәлә, Түбән Кама, Әлмәт, Әтнә театры коллективлары үтте. Ачылыш тантанасында кунакларны район башлыгы Айдар Сәлахов сәламләде.

– Театр сәнгате ул мәңгелек. Бөек татар шагыйре Габдулла Тукай теле белән әйткәндә: «Театр яхшылыкка, нурга илтә. Кире юлга җибәрми, уңга илтә». Сез мондый чаралар белән киләчәк буыннарны тәрбияләүдә, гореф-гадәтләрне, традицияләрне саклауда зур көч куясыз, – диде ул.

Татарстанның мәдәният министры урынбасары Ленар Хәкимҗанов, Кәрим Тинчурин исемендәге Татар дәүләт драма һәм комедия театры директоры Фәнис Мөсәгыйтов та катнашучыларга ихлас теләкләрен җиткерде. Ачылу тантанасында республиканың театраль Сабан туе әләмен узган елгы көрәш батыры, Минзәлә театры артисты Нәфис Гайнуллин күтәрде.

Театрлар Сабан туе, гадәти Сабан туеның бөтен шартын китереп, милли бәйрәмнең барлык традицион уеннары белән узды. Артистлар 13 төрле ярышта үзләрен сынап карады. Театр артистлары һәм хезмәткәрләре милли көрәш мәйданында бил алышудан тыш, волейбол уенында (анысы быел беренче тапкыр узды) һәм бию марафонында катнаштылар. Мәйдан ду килде, әллә ничәгә бүленеп, һәр почмакта уеннар башланды. Берсендә таяк тартыштылар, икенчесендә капчык киеп, агач кашыкка йомырка салып йөгерделәр, башкаларында чиләк-көянтә белән су ташыдылар, капчык белән сугыштылар, кул көрәштерделәр, чүлмәк ваттылар, гер күтәрделәр. Артист халкы, шау-гөр килеп, беренчелек өчен көрәште, кыскасы.

 

Барыннан да бигрәк аркан тарту ярышы кызу барды. Янып-пешеп аркан тарткан хезмәттәшләре өчен артистлар да, тамашачылар да көч биреп торды. Нәтиҗәдә Минзәлә театрында эшләүче хатын-кызларны бер дәүләт театры да уздыра алмады. Алар инде 14 нче тапкыр беренчелекне беркемгә дә бирми.

Капчык киеп йөгерү, авыш колгага менү, чүлмәк вату кебек традицион уеннардан тыш, артистлар бию марафонын ярата. Һәр театрдан берәр пар сәхнә түрендә берьюлы төрле музыкага биеде. Биюдән соң бер пар төшеп кала барды. Жюри әгъзалары җиңүче итеп Тинчурин театрын билгеләделәр, икенче урынга – Минзәлә, ә өченче урынга Камал театры артистларын куйдылар.

Милли бәйрәмебезнең күрке саналган көрәш Сабан туеның да иң мавыктыргыч өлеше булды. Артистлар арасында да оста итеп көрәшүчеләр бар икән. Баш батыр исеме өчен Минзәлә театрыннан Илназ Хисмәтуллин һәм Габдулла Кариев исемендәге Казан татар дәүләт яшь тамашачылар театры артисты Муса Камалов көрәште. Нәтиҗәдә Муса өстен чыкты. Батырга башка елларда тәкә һәм автомобиль бирелсә, быел тәкәгә өстәп, суыткыч бирелде.

– Әлегә нәрсә булганын үзем дә аңлап бетермим. Сабан туена килеп, көрәштә катнашкач, җиңүне көтәсең инде ул, тик батыр калырмын дип уйламыйсың. Әйбәт килеп чыкты, Аллага шөкер. Оештыручыларга бик зур рәхмәт. Тәкә безнеке! – диде Муса.

Быел төп бүләк – машина Сабан туе батырына түгел, ә ярышларда иң күп балл җыйган театрга бирелде. Ярыш нәтиҗәләре буенча, өченче урынга Галиәсгар Камал театры чыкты, икенче урынны Габдулла Кариев исемендәге яшь тамашачылар театры һәм Сабир Өметбаев исемендәге Минзәлә театры алды. Беренче урынга Кәрим Тинчурин театры командасы лаек булды. Алар Театрлар Сабан туеның төп бүләге – «Лада-Веста» автомобиле белән бүләкләнде.

                                                                                                  Ләйсән Сафина

Фото: Татар-Информ

 

Җиңүчеләр

1. Көрәш (70 килога кадәр авырлыкта).

1 урын – Илфат Гыйбадуллин (Кариев театры);

2 урын – Раушан Мөхәммәтҗанов (Әлмәт дәүләт драма театры);

3 урын – Эльмир Нургалиев (Әлмәт дәүләт драма театры).

Көрәш (80 килога кадәр авырлыкта).

1 урын – Муса Камалов (Кариев театры);

2 урын – Алмаз Фәтхуллин (Тинчурин театры);

3 урын – Илфак Хафизов (Тинчурин театры).

Көрәш (80 килодан артык авырлыкта).

1 урын – Илназ Хисмәтуллин (Минзәлә театры);

2 урын – Рөстәм Гайнетдинов (Чаллы драма театры);

3 урын – Эмиль Ерофеев («Әкият» курчак театры).

2. Йомырка салынган кашык кабып йөгерү.

Ир-атлар:

1 урын – Айрат Мифтахов (Әлмәт дәүләт драма театры);

2 урын – Радик Сафиуллин (Әтнә театры);

3 урын – Рәис Әхмәтзакиров (Кариев театры).

Хатын-кызлар:

1 урын – Индира Маликова (Чаллы драма театры);

2 урын – Тамчыгөл Сәлахова (Түбән Кама театры);

3 урын – Алсу Сибгатуллина (Әлмәт дәүләт драма театры).

3. Көянтә-чиләк белән йөгерү.

Ир-атлар:

1 урын – Салават Хәбибуллин (Тинчурин театры);

2 урын – Андрей Мокренко (Чаллы курчак театры);

3 урын – Фаил Сафиуллин (Әлмәт дәүләт драма театры).

Хатын-кызлар:

1 урын – Гөлүсә Сөнгатуллина (Камал театры);

2 урын – Гүзәл Шәрәфуллина (Кариев театры);

3 урын – Сабирә Усманова (Түбән Кама театры).

4. Кул көрәштерү.

Ир-атлар:

1 урын – Илназ Гафиятов (Тинчурин театры);

2 урын – Әминов И.Н. (Камал театры);

3 урын – Бәдриев Ф. (Минзәлә театры).

Хатын-кызлар:

1 урын – Айгөл Фәррахова (Минзәлә театры);

2 урын – Люзия Чупашова (Түбән Кама театры);

3 урын – Ольга Ковылова («Әкият» курчак театры).

5. Капчыкта парлап сикерү.

Ир-атлар:

1 урын – Рәдис Гарипов, Тамчыгөл Сәләхова (Түбән Кама театры) ;

2 урын – Әхмәтзакиров Рәис, Эльвира Җәббарова (Кариев театры);

3 урын – Тахир Башаров, Зөлфия Башарова (Тинчурин театры).

6. Гер күтәрү.

1 урын – Егор Митрофанов (Чаллы курчак театры);

2 урын – Артур Әхмәтов (Кариев театры);

3 урын – Олег Кинҗәгулов (Чаллы драма театры).

7. Таяк тартышу.

Ир-атлар:

1 урын – Рәсүл Хәсәнов (Түбән Кама театры);

2 урын – Илдар Шаһимәрданов (Кариев театры);

3 урын – Илнар Гатиятуллин (Әтнә театры).

Хатын-кызлар:

1 урын – Айгөл Фәррахова (Минзәлә театры);

2 урын – Гөлназ Әгъзәмова (Чаллы драма театры);

3 урын – Айсылу Мөсәлләмова (Тинчурин театры).

8. Аркан тартышу.

Ир-атлар:

1 урын – Камал театры;

2 урын – Чаллы драма театры;

3 урын – Минзәлә театры.

Хатын-кызлар:

1 урын – Минзәлә театры;

2 урын – Әтнә театры;

3 урын – Чаллы драма театры.

9. Капчык сугышы.

1 урын – Линар Муканбетов («Әкият» курчак театры);

2 урын – Алмаз Шаһимәрданов (Әлмәт дәүләт драма театры);

3 урын – Рәдис Гарипов (Түбән Кама театры).

10. Чүлмәк вату:

1 урын – Илдус Габдрахманов (Камал театры);

2 урын – Илнур Байназаров (Тинчурин театры);

3 урын – Лилия Нәҗипова («Әкият» курчак театры).

11. Бию марафоны.

1 урын – Илфак Хафизов һәм Юлия Выборнова (Тинчурин театры);

2 урын – Илнур Гайниев һәм Зөлфирә Гәрәева (Минзәлә театры);

3 урын – Артур Шәйдуллин һәм Ләйсән Гатауллина (Камал театры).

12. Авыш баганага менү.

1 урын – Юрий Павлов (Түбән Кама театры);

2 урын – Айдар Фәтхрахманов (Тинчурин театры);

3 урын – Наил Ибраһимов (Кариев театры).

13. Волейбол.

1 урын – Чаллы драма театры;

2 урын – Камал театры;

3 урын – Тинчурин театры.