Июль, елдагыча, яңалыктан башланачак. Гадәттәгечә, ай башыннан коммуналь хезмәтләр өчен тарифлар үзгәреш кичерәчәк. Ул бигрәк тә башкала халкы өчен сизелерлек булачак.
1 июльдән бөтен Россия буенча коммуналь хезмәтләргә (газ, электр энергиясе һәм каты коммуналь калдыклар белән эш итү) тарифларны үзгәртү ниятләнә. Татарстанда бу түләүләр уртача алганда 6,2 проценттан да артмас дип ышандыралар. Казанда бу күрсәткеч 13 проценттан артмаска тиеш. Республикада яшәүчеләр яңа тарифлар буенча исәпләнгән квитанция кәгазьләрен август аенда алачак.
Бәя үзгәреше сәбәпсез түгел. Әйтик, Казанда су һәм канализация торбаларының 70 проценты тузган. Бу инде аварияләр санына да тискәре йогынты ясый. Узган ел 96 очрак булса, 2022 елның соңгы айларында гына да 80нән артып киткән. Казандагы су һәм канализация торбаларының гомуми озынлыгы – 3 мең чакрым тирәсе. Ел да тикшереп, төзекләндереп торсалар да, барысын да колачларга мөмкинлек җитми. Тулаем яңарту эшләре өчен иң кимендә 40 млрд сум акча кирәк. Моңа исә бюджеттан акча каралмаган.
Сүз уңаеннан, Татарстанның коммуналь инфраструктурасын узган ел 5,7 млрд сумга тәэмин иттеләр. 2022 елда әлеге сумма 2,5 тапкыр – 13,9 млрд сумга кадәр арттырылды. Шуның 9 млрд сумын бюджеттан тыш чыганаклардан табарга тиешләр.
Коммуналь хезмәтләргә тарифны арттыру хисабына алынган акчаны Чистай, Парин, Имәнлек, Ершов, Гудованцев, Восстание, Кызыл Кокшай урамнарындагы, Ямашев проспектындагы магистраль коллекторларны төзекләндерүгә тотачаклар. Шулай ук Гадел Кутуй, Толстой, Ломжа, Назарбаев, Кол Гали, Декабристлар, Мәүлетов, Гладилов, Серов, Щапов, Архангельск һәм Дорожная урамнарында су торбаларын ремонтлау күздә тотыла.
– Казанда миллионнан артык кеше яши. Бүтән калалар белән чагыштырып караганда, тарифлар буенча без – 14 нче урында. Мәскәү, Түбән Новгород, Ростов-Дон, Волгоград, Уфа, Воронеж бездән алдарак тора, – ди башкаладагы «Водоканал» җәмгыятенең директор урынбасары Таһир Вәлиев.
Башкалада яшәүчеләр күпме түли?
| Хезмәт | Ничә сум булачак? |
| Табигый газ | 6,25 сум/куб.м |
| Газ плитәсе булган фатирларда электр энергиясе | 1 кВт/сәг өчен – 4,30 сум |
| Электр плитәсе булган фатирларда электр энергиясе | 1 кВт/сәг өчен – 3,20 сум |
| Күпфатирлы йортларда яшәүчеләр өчен каты көнкүреш калдыклары белән эш итү | 99,93 сум (1 кешегә) |
| Шәхси йортларда яшәүчеләр өчен каты көнкүреш калдыклары белән эш итү | 108,40 сум (1 кешегә) |
| Су белән тәэмин итү | 24,8 сум/куб.м |
| Су чыгару | 27,6 сум/куб.м. |
Фото: Татар-информ
АнонимЯхшы кеше кайдада югалмас,без ышанабыз тыныч булсын.Бакчада балтырган үсеп утырган өчен күпме штраф каралуын әйткәннәр
Загрузка ...
