Экстрим-шоу, арт-фестиваль, рус эстрадасының популяр җырчылары: Яшьләр көнен кайда һәм ничек билгеләп үтәчәкләр?

27 июньдә Россиядә Яшьләр көне билгеләп үтелә. Татарстан шәһәрләрендә бәйрәмгә ничек әзерләнәләр?

Казан

Башкалада бәйрәм 26 июньдә ачык һавадагы фестиваль форматында үтәчәк. Бу хакта Казан мэриясе хәбәр итә.

«Урам» экстрим-паркында берьюлы берничә мәйданчыкта бию батллары, стендап-комикларның чыгышлары, арт-фестиваль һәм «шигъри слэм» узачак. Гомумән, парк территориясендә берничә интерактив мәйданчык бар. Һәр мәйданчык өчен үзенчәлекле программа әзерләнгән.

Әйтик, 14.00 сәгатьтән 20.00 сәгатькә кадәр экстрим-парктагы амфитеатрда «хип-хоп» һәм «данс-холл» буенча бию батллары узачак.

Тамашачыларны импровизация жанрындагы чыгышлар да көтә. Әйтик, 17.00 сәгатьтән 18.00 сәгатькә кадәр – «Сытые» командасы, ә 18.00 сәгатьтән 20.00 сәгатькә  кадәр парктагы «Белем чатыры»нда танылган юморист Павел Дедищев һәм «Stand Up Club Kazan» резидентлары чыгыш ясаячак.

Фестивальгә керү – бушлай, алдан теркәлергә генә кирәк.

15.30 сәгатьтән 22.00 сәгатькә кадәр Кремль яр буендагы төп сәхнәдә бәйрәм концерты булыр дип көтелә. Концертның махсус кунагы – Niletto.

 Чаллы

Автокалада 25 июньдә бәйрәм итәчәкләр. Бәйрәм чаралары Чулман проспектыннан «Яр буе» паркындагы мәйданга кадәр узачак.

16.00 сәгатьтә интерактив мәйданчыклар эшли башлаячак. Монда яшь дизайнерлар эшләнмәләреннән күргәзмә дә оештырылачак.

17.00 сәгатьтә «Яр буе» паркындагы мәйданда концерт башланыр дип көтелә. Чаллы халкы һәм кунаклар өчен иҗат коллективлары, спортчылар һәм модельләр чыгыш ясаячак. Бәйрәм программасы мото- һәм автоклублар парады белән башланып китәчәк. Оештыручылар шулай ук «КамАЗ» тарафыннан әзерләнгән экстрим-шоу вәгъдә итә.

Бәйрәм концертын Богдан Кантемиров һәм Роман Миронов алып барачак. Махсус кунаклар – Gayazovs Brothers төркеме.

Бәйрәм 22.00 сәгатьтә салют белән тәмамланачак.

Түбән Кама

Нефтехимиклар шәһәрендә дә бәйрәмне 25 июньдә уздырачаклар. Чаралар «Әйдә» экстрим паркында һәм «Кызыл Чишмә» яр буенда үткәреләчәк.

10.00 сәгатьтә «Әйдә» экстрим-паркында экстремаль спорт төрләре буенча ярышлар узачак.

15.00 сәгатьтән 17.00 сәгатькә кадәр экстрим-парк янында балалар белән әти-әниләре өчен күңел ачу чаралары оештырылачак.

17.00 сәгатьтән «Кызыл Чишмә» яр буенда төрле остаханәләр эшли башлаячак.

19.00 сәгатьтә концерт башланачак. 20.30 сәгатьтә «Friend» төркеме, 21.00 сәгатьтә кичәнең махсус кунагы – Ханна чыгыш ясар дип көтелә.

Бәйрәм дискотека һәм салют белән төгәлләнәчәк.