Һәр йортта берәр Фәүзия яшәсә, бар җиребез балкып торыр иде. Казанның Әпсәләмов урамындагы 28 нче йортның ишегалды иртәнге яздан кар төшкәнчегә кадәр аллы-гөлле чәчәкләргә күмелеп утыра. Шушы йортта яшәүче Фәүзия Хәйруллинаның тырышлыгы бу. «Матурлык белән генә кешене тәрбияләп була», – ди ул. Гүзәллеккә кул сузучыларны да тәртипкә өйрәткән, хәзер аның чәчәген берәү дә рөхсәтсез өзми.
Менә унбиш ел инде аның өй каршындагы бакчага чыкмыйча калган көне юк. Ике сәгать вакыты шунда үтә. Торактан файдалану идарәсендә (ЖЭУ) идән җыештыруы булып эшли ул, моңа кадәр 20 еллап урам себергән. Үзе Саба якларыннан. Улы гаиләсе белән яши. Чисталык яраткан ханым тирә-юньне матурлыкка күмәргә булган. Чәчәк үстерү җанга тынычлык бирә, ди. Быел чәчәкләр бәйгесендә беренче урынны алган икән.
– Без бу йортка килгәндә, бакчаның коймасы юк иде. Кешеләр тәрәзә төбеннән сукмак ясап йөрде. Болай булмас дип, мәрхүм ирем белән иске-москы агачлардан бакча ясадык. Анда чүп үлән үстереп булмый бит инде. Башта мальва утырттым, тик ул бөтен җирне басты. Аны чистартып башка чәчәкләр утырттык. Базарга чыккач, виноград үсентесе күрдем. Сатып алмыйча түзә алмадым. Башта үсмәде, хәзер шаулап утыра. Җимешне дә мулдан бирә. Балалар рәхәтләнеп ашый, – ди 59 яшьлек Фәүзия апа.
Лаләләрне бик ярата икән. Ирис, флокс, нәркиз, петуния, гортензия, ромашка, күкчәчәк. Чәчәкләрнең ниндие генә юк. Иң түрдә – үзебезнең көнбагыш. Җил тегермәне, шарлавык, гөмбәләр белән дә бизәгән бакчаны. Затлы роза, лилияләрне утыртып караган, тик “озынкул”лар тамыры белән умырып алып киткәннәр. Бу хәл күптән булган инде. Шуннан бирле бары гади чәчәкләргә генә өстенлек бирә. Аларга сокланып китүчеләр күп икән.
– Теләгән һәр кеше үз бакчасын шулай гүзәл итә ала. ЖЭУ орлыгын да, чүлмәген дә, туфрагын да бирә. Суны да көйләп куйдылар. Бакчаны карарга вакыт һәм тырышлык кирәк. Иртә белән су сибәм, ашлыйм. Эшеңнең нәтиҗәсен күрү, күршеләрдән, йорт янәшәсеннән узып китүчеләрдән рәхмәт ишетү рәхәт, – дип елмая Фәүзия Хәйруллина.
Сәрия Мифтахова
Фото: Илдар Мөхәммәтҗанов
Г.Сабырлык, күңел тынычлыгы Эльвирага. Бигрәк аяныч фаҗига.Эльвира Фазлыева кызы үлгәннән соң булган коточкыч хәлләр турында сөйләгән
