10 сентябрьдән бирле Татарстанда барлыгы ун авыл хуҗалыгы ярминкәсе узган. Фермерлар аларда җәмгысе 1 миллиард 26,2 миллион сумлык азык-төлек саткан. Шәһәр халкы бигрәк тә яшелчәне (13 мең 885,7 тонна) күп сатып алган. Авыл хуҗалагы һәм азык-төлек министрлыгы матбугат хезмәтеннән хәбәр ителгәнчә, ярминкәләрдә, шул исәптән, 9001,9 тонна бәрәңге, моннан тыш 160,4 тонна сөт, 1043,8 тонна ит (635,8 тоннасы – сыер ите) сатып җибәрелгән.
Исегезгә төшерәбез: ярминкәләр һәр шимбә саен Казанның 14 мәйданчыгында, Чаллы һәм Яшел Үзән районнарында – 2, Түбән Камада 3 урында үткәрелә. Моннан тыш алар төрле вакытта 26 районда уздырылып килә. Республикада көзге ярминкәләр 24 декабрьгә кадәр дәвам итәчәк. Аларны үткәрүдә 32 район катнаша.
