Бүген Татарстан Республикасы һәм Россия Фәннәр академиясе арасында фәнни-техник һәм технологик хезмәттәшлек турында килешү имзаланды. Документка Татарстан Президенты Рөстәм Миңнеханов һәм Россия Фәннәр академиясе президенты Геннадий Красников кул куйды.
Имзалау тантанасы Хөкүмәт Йортында «Татнефтехиминвест-холдинг» АҖ Директорлар советы утырышы кысаларында узды.
Россия Фәннәр академиясе директорлар Советында Татарстан белән хезмәттәшлек буенча планнар тәкъдим итте. «Ил алдында торган сынауларны стандарт алымнар белән генә хәл итеп булмый. Безнең институтларны дәүләт биремнәре кысаларында практик проблемаларны хәл итүгә юнәлтәчәкбез», – диде Россия Фәннәр академиясе президенты Геннадий Красников Россия Фәннәр академиясе вице-президенты Степан Калмыков Татарстан предприятиеләре белән хезмәттәшлекнең яңа юнәлешләре турында сөйләде. Бу – «ТАНЕКО» («Татнефть» төркеме) производстволарында авыр нефть чималын, биомассаны һәм хлорлы пластикларны эшкәртү. Башка проектлар арасында — «Транснефть-Синтез» компаниясе өчен турбулентлыкка каршы прсадкалар эшләү, Түбән Кама ТЭЦында («Татнефть» төркеме) СО2 утильләштерү, үтә чиста водород алу, «ТАИФ-НК» нефть эшкәртү заводлары тарафыннан нефть эшкәртү.
Рөстәм Миңнеханов утырыш барышында Иннополис Университеты белән хезмәттәшлекнең төп юнәлешләре билгеләнәчәген әйтеп үтте. Моннан тыш, Россия Фәннәр академиясенең «Татнефть» компаниясе һәм Татарстан Экология һәм табигый байлыклар министрлыгы белән хезмәттәшлеге актив үсә.
Нәтиҗәле хезмәттәшлекнең мисалы итеп ул Әлмәттәге фәнни лабораторияләрнең эшен китерде. Аерым алганда, Рөстәм Миңнеханов Әлмәттә югары нефть мәктәбе һәм фәнни-белем бирү үзәге булдыру буенча эш алып барылуын искәртте. Моның өчен бүген «ТатНИПинефть» институты кадрлары җәлеп ителә.
Рөстәм Миңнеханов шулай ук Россия Фәннәр академиясен Түбән Камада фәнни-белем бирү үзәген булдыруда катнашырга тәкъдим итте. Проектның партнерлары-СИБУР һәм «Татнефть» компанияләре.
Моннан тыш, галимнәрнең ике як өчен дә файдалы хезмәттәшлеге машина төзелеше өлкәсендә җайга салынырга мөмкин. Казан федераль университеты катнашында әлеге проектны Россия Хөкүмәте Рәисе Михаил Мишустин хуплый, дип искәртте ТР Президенты.
