Татарстан Республикасында ачыкланган Covid-19 авырулары саны 19%ка арткан. ОРВИ һәм грипп белән авыручылар саны эпидемия бусагасыннан 82%ка арткан. Шуңа бәйле рәвештә Татарстан Республикасы буенча Баш санитар табиб карары белән быелның 15 декабреннән берничә чикләү чарасы кертелә. Бүген бу хакта Татарстан Республикасы Президенты Рөстәм Миңнеханов Татарстан Республикасы Хөкүмәте Йортында узган киңәшмәдә хәбәр итте.
Ул билгеләп үткәнчә, шул исәптән стационар медицина һәм мәгариф оешмаларында һәм социаль хезмәт күрсәтү оешмаларында стационар авыруларны хастаханәләрдә һәм тәүлек буе булу урыннарында балалар һәм өлкәннәргә бару тыела. Персонал һәм килүчеләр өчен мәҗбүри битлек режимы кертелә. Мәҗбүри термометрия таләбе көнгә ике тапкыр билгеләнә.
«Грипп һәм ОРВИ сәбәпле төркемнәрдә һәм сыйныфларда балаларның 20%ы һәм аннан да күбрәк өлеше булганда, укыту һәм тәрбия процессын туктату күрсәтелгән, — дип билгеләп үтте Рөстәм Миңнеханов. — Дезинфекция режимын көчәйтергә, социаль учреждениеләрдә һәм предприятиеләрдә керү фильтрлары эшенә контрольне көчәйтергә, хезмәт коллективларында санитар-эпидемиягә каршы таләпләрне катгый үтәүне көчәйтергә кирәк».
Рөстәм Миңнеханов киңәшмә барышында хәбәр иткәнчә, мобилизацияләнгән гаиләләрдәге балалар өчен Яңа ел чыршылары оештырылачак. «Без 22-24 декабрьдә 1-4 сыйныф укучыларын Казан Кремле территориясендә Яңа ел тамашасына чакырдык. Ә 25 декабрь көнне 5-11 сыйныф укучылары «Татнефть Арена» боз сараенда узачак республика Яңа ел чыршысына чакырылдылар», — диде ул.
ТР Мәдәният министрлыгына һәм ТР Яшьләр эшләре министрлыгына бу чараларны иң югары дәрәҗәдә оештырырга кушылды.
Рөстәм Миңнеханов шулай ук муниципаль районнар башлыкларына, ТР Транспорт һәм юллар хуҗалыгы министрлыгына, ЮХИДИ идарәсенә – балаларны әлеге чараларны уздыру урынына иминһәм уңайлы алып баруны тәэмин итәргә кушты.
Моннан тыш, Рөстәм Миңнеханов Яңа ел алды чаралары кысаларында бөтен ил буенча «Теләкләр чыршысы» бөтенроссия акциясе узуын искәртте. Ул барлык түрәләргә һәм депутатларга бу чарада актив катнашырга тәкъдим итте.
Кышкы каникуллар чорында республикада 13 меңгә якын баланы һәм яшүсмерне савыктыру кампаниясе планлаштырыла, дип хәбәр итте Татарстан Президенты, моның өчен республиканың 240 савыктыру оешмасы җәлеп ителәчәк.
Рөстәм Миңнеханов шулай ук ТР Спорт министрлыгына ябык һәм ачык спорт объектларының төзек техник торышын, аларның өзлексез эшләвен һәм кышкы каникуллар чорында төбәктә яшәүчеләр өчен һәркем мөмкин булуны тәэмин итәргә кушты. «Барлык спорт инфраструктурасы максималь рәвештә файдаланылырга тиеш, шул исәптән балалар чараларын уздыру өчен дә», — дип ассызыклады ул.
«Бәйрәм көннәрендә кышкы явым-төшем һәм тотрыксыз һава торышы шартларында җәмәгать иминлеген тәэмин итүгә аерым игътибар бирергә кирәк, — диде Рөстәм Миңнеханов. – Бу бигрәк тә юлларны, җәмәгать киңлекләрен һәм ишегалды территорияләрен карап тотуга кагыла. Җәмәгать транспортының өзлексез эшләве дә оештырылырга тиеш».
Ул тиешле министрлыкларга һәм ведомстволарга Яңа ел каникуллары вакытында тәүлек буе кизү торуны оештырырга кушты. «Барлык хезмәтләр дә җәлеп ителергә тиеш, Яңа ел каникуллары вакытында штаттан тыш хәлләр килеп чыгу ихтималына кичекмәстән игътибар итү өчен тәүлек буе кизү торырга, җаваплы затлар билгеләнергә тиеш», — дип йөкләде Рөстәм Миңнеханов.
