Кичә Казанның “KazanMall” сәүдә үзәгендәге “Киномакс” кинотеатрында Мостай Кәримнең “Ярлыкау” повесте буенча төшерелгән “Помилование” фильмын тәкъдим иттеләр. Бүгеннән әлеге фильм Россиянең ике меңгә якын кинотеатрында киң прокатка чыга.
– Фильмны әдипнең туганнары – Мостай Кәримнең кызы Әлфия Мостаевна һәм оныгы Тимербулат Кәримов (продюссерларның берсе – Авт.) белән бергә эшләдек, – диде фильмның режиссеры Айнур Әскәров.
Фильмны беренчеләрдән булып караучылар арасында Татарстан Рәисе Рөстәм Миңнеханов та бар иде. “Карарга киңәш итәм – бик гыйбрәтле тарих”, – дип бәяләгән ул әлеге фильмны Телеграмдагы каналында.
Казан тамашачылары белән очрашуга фильмда төп рольләрне башкарган яшь актерлар – Николай Галләмов, Саша Новиков һәм Җәмилә Мөдәрисова (Камал театры артисты Алинә Мөдәрисованың сеңлесе – авт.) да килгән иде.
