Татарстан Югары Суды үз аягында йөри алмау хәленә килгән 68 яшьлек пенсионер хатын-кызны рәхимсез төстә үтерү турында эш буенча хөкем карары чыгарган. Аның белән бергә яшәгән ирне җинаять оештырган өчен – 20 елга, ирнең дустын, үтерүчене – 13 елга ирегеннән мәхрүм иткәннәр. Бу хакта “ТНВ” хәбәр итә.
Тикшерүчеләр ачыклаганча, хөкем ителүчеләр 2021 елның 17 июнендә әлеге хатын-кызның Казан шәһәре Грузовая урамында урнашкан йортына ут төрткән. Инвалид хатын-кыз, йөри алмавы сәбәпле, тереләй янып үлгән. Тегеләр шундук кулга алынган. Җинаять алдыннан хатын-кызны йортын, машинасын һәм фатирын сату-алу килешүенә кул куярга мәҗбүр иткәннәр. Соңгысын ир 800 мең сумга саткан.
Җинаять эше буенча, җинаятьче ир һәлак булган хатын-кыз белән 2017 елда танышкан. Озакламый болар бергә яши башлаган. Шуннан соң хатын-кыз туганнары белән аралашудан туктаган. Сөяркәсе йөри алмый башлагач, ир үзе янына дустын – җинаятьтәшен дә алган.
Судта үтерүне оештыручы ир-ат, янәсе, җинаятькә бернинди дә катнашы булмавын расларга маташкан. Имештер, дусты аңа яла яккан. Җинаятьтәше исә үзен тыныч тоткан. Суд утырышында берни дәшмичә, күзләрен идәнгә төбәгән хәлдә тыңлап кына утырган.
