Россия һәм Кытай башлыкларының шәхси тырышлыгы нәтиҗәсендә төбәкара хезмәттәшлекне үстерү өчен яхшы мөмкинлекләр булдырылган. Бу хакта Татарстан Республикасы Рәисе Рөстәм Миңнеханов «РОСТКИ: Россия һәм Кытай – үзара файдалы хезмәттәшлек» халыкара икътисадый форумын ачуда хәбәр итте. Чара «Казан Экспо» мәйданчыгында уза. Бу хакта Татарстан Рәисе матбугат хезмәте хәбәр итә.
«Якын арада хәл ителәчәк мөһим бурыч – яңа шартларда җитештерү өлкәсенең тотрыклылыгын арттыру. Кытай куелган максатларга ирешүдә ышанычлы партнер булып тора», — дип ассызыклады Рөстәм Миңнеханов.
Татарстан Рәисе билгеләп үткәнчә, форумның эшлекле программасы 11 тематик юнәлеш буенча 40 сессияне үз эченә ала. Алар ике яклы хезмәттәшлекнең иң актуаль һәм кискен мәсьәләләренә кагыла. Шулай ук форумда катнашучылар өчен «Russia China Expo» күргәзмәсе оештырылган, анда Россия һәм Кытайның эре инвестиция һәм инфраструктура проектлары, шулай ук машина төзелеше һәм металл эшкәртү комплексының берничә оешмасы тәкъдим ителгән. Аерым мәйданчыкта Кытай автомобильләренең төрле модельләре тәкъдим ителгән.
Форум кысаларында мәдәни-спорт программасы мөһим урын алып тора. Рөстәм Миңнеханов билгеләп үткәнчә, бу көннәрдә Казанда РФ һәм КХРның тугандаш шәһәрләре командалары арасында иптәшләрчә шахмат турниры, «Ак Барс» һәм «Куньлунь Ред Стар» арасында хоккей матчы, Россия-Кытай дуслыгы яшьләр фестивале, Кытай киносы фестивале һәм башка күп нәрсәләр узачак.
«Без форум кысаларында Россия һәм Кытай компанияләре арасында конкрет килешүләр һәм үзара файдалы шартнамәләр имзаланыр дип көтәбез», — дип белдерде республика Рәис.
Рөстәм Миңнеханов киләсе елда Казанда форумны 14-15 ноябрьдә оештыру планлаштырыла, дип өстәде.
Синьцзян-Уйгыр автономияле районы Хөкүмәте Рәисе урынбасары Мәрдан Мукийит Россия-Кытай хезмәттәшлеге потенциалын югары бәяләде. «Үзара файдалы һәм бер-беребезне тулыландырыла торган хезмәттәшлек — безнең уртак максатыбыз. Без тырышлыгыбыз белән эшлекле элемтәләребезне үстерүнең яңа юлларын билгели алачагыбызга ышанабыз», — диде ул.
«Безнең илләр җитәкчеләре дуслык мөнәсәбәтләре нәтиҗәсендә Россия белән Кытайның озак вакытлы хезмәттәшлегенә яхшы нигез салдылар. Моның өчен конкрет проектлар кирәк. Әлеге форумның форматы бу максатка ирешүгә ярдәм итәр дип уйлыйм», — дип ассызыклады Киров өлкәсе Губернаторы Александр Соколов.
«Бүген Кытай — безнең иң зур сәүдә партнерыбыз, урман сәнәгате өлкәсендә генә түгел, ә башка тармакларда да. Без һәрьяклап аралашуыбызны үстерергә телибез. Әлеге форумны үткәрү безнең элемтәләрне ныгытырга мөмкинлек бирер дип ышанам», — дип ассызыклады Коми Республикасы Башлыгы Владимир Уйба.
Кытайның Россия Федерациясендәге Илчелегенең сәүдә-икътисад мәсьәләләре буенча киңәшчесе Юй Хунчи форумны оештыру дәрәҗәсен югары бәяләде һәм Кытайның Россия төбәкләре, шул исәптән Татарстан белән товар әйләнеше артуын билгеләп үтте.
Аннары Рөстәм Миңнеханов һәм башка кунаклар күргәзмә экспозициясе белән таныштылар. Аерым алганда, биредә Татарстанның эре нефть химиясе предприятиеләре, Россия һәм Кытай станоклар төзү вәкилләре, шулай ук фәнни-мәгариф учреждениеләре стендлары тәкъдим ителгән. Моннан тыш, республика Рәисе Кытай автомобильләренең 30дан артык моделен карады.
Белешмә өчен:
«РОСТКИ: Россия-Кытай — үзара файдалы хезмәттәшлек» беренче халыкара форумы 7-8 сентябрьдә узачак. Бу Россия төбәкләре һәм Кытай провинцияләре арасында икътисадый хезмәттәшлекне үстерү өчен яңа еллык мәйданчык. Чара яңа инвестиция проектларын гамәлгә ашыру һәм Кытай партнерлары белән уртак җитештерүләр булдыру өчен башлангыч нокта булып хезмәт итәчәк. 3000нән артык катнашучы планлаштырыла, шул исәптән 19 рәсми Кытай делегациясе.
