Бүген көндез ашыгыч хезмәтләрнең 112 номерына Арча районы Яңа Чүриле авылында бер ир-атның суга батуы турында хәбәр кергән. Бу хакта “Татар-информ” Россия Гадәттән тыш хәлләр министрлыгының Татарстандагы Баш идарәсе матбугат хезмәте мәгълүматларына таянып яза.
Күрсәтелгән урынга шундук коткаручыларның дежур сменасы килеп җиткән. Башлангыч мәгълүматларга караганда, 69 яшьлек исерек ир-ат текә ярдан ерганакка егылып, инеш суына батып үлгән.
Коткаручылар ир-атның мәетен ярдан 2 метр ераклыкта су өстеннән тартып чыгарып, полиция хезмәткәрләренә тапшырган.
Килеп туган хәлнең барлык нечкәлекләре ачыклана.
![08D2025A-93D4-4CD7-8E31-C6C4CDFC7C6E[1]](https://vatantat.ru/wp-content/uploads/2020/07/08d2025a-93d4-4cd7-8e31-c6c4cdfc7c6e1-150x150.jpeg "Татарстанда машина текә ярдан елгага төшеп киткән")