Татарстан Фәннәр академиясенең әдәбият бүлегенең әйдәп баручы фәнни хезмәткәре, филология фәннәре докторы Фәрит Яхин татар әдәбиятында иң күп өйрәнелгән һәм укылган әсәрне атады. Бу хакта ул «Татар-информ» агентлыгы хәбәрчесенә биргән әңгәмәсендәсөйләде.
«Ахырзаман» безнең татарда иң күп укылган, өйрәнелгән китапларның берсе. Ни өчен? Барыгыз да беләсез, апокалипсисны күзаллау-күзаллату белән бәйле. Бу китапны XIX гасырда руслар да тикшергән, татарлардан иң күп өйрәнгән галим — Гали Чокрый. Ул аның тәнкыйди текстларын эшләгән. Аны безгә китап итеп бастырып җиткерә алган», — диде ул.
Галим фикеренчә, «Ахырзаман китабы» — Адәм галәйһиссәламнең китабы ул. Апокалипсис хәбәрләре Адәм пәйгамбәрдән килә. «Сөләйман Бакыргани аны шигырьгә, шигъри калыпка салып безгә җиткерә», — дип аңлатты Фәрит Яхин.
«Шул вакыттагы телнең үзенчәлегенә игътибар итик. Ул бүгенге телебездән аермалы. Харәзм төркиләре теле, ягъни фарсы һәм гарәп телләре белән кушылганлыгы, баетылганы күренеп тора. Төрки-кыпчакның язмада төп теле, әлбәттә, „төрки тел“ дип әйтелә», — диде әдәбият галиме.
