Леонид Слуцкий үзенең беренче рәсми матчында җиңә алмады. «Рубин» һәм «Тамбов» очрашуы 0:0 исәбе белән тәмамланды. Казанлыларның соңгы җиңүе узган елның 5 октябрендә Казанда шул ук «Тамбов» (2: 1) командасы белән уйнаганда табылган.
Казанлыларның баш тренеры берьюлы дүрт яңа уенчыны: сакчы Пабло Сантосны, ярымсакчылар Оливер Абильдгора һәм Дарко Йевтичны, шулай ук һөҗүмче Иван Игнатьевны чыгарды. РПЛда үзенең беренче уенын Карл Старфельт үткәрде. Моңа кадәр ул бары тик «Химки»га каршы кубок уенында бер тайм уйнаган иде. Калган позицияләр үзгәрешсез калды: капка төбендә Юрий Дюпин, Олег Данченко һәм Александр Зуев оборонада, Хвич Кварацхелия, Вячеслав Подберезкин һәм Игорь Коновалов.
Хәзерге «Рубин» узган елгыдан әллә ни аерылмый: фланглар аша шул ук уен, тупны контрольдә тоту һәм аның белән нишләргә белмәү. Вячеслав Подберезкин һәм яңа уенчы Оливер Абильдгор үзләрен яхшы яктан күрсәтмәделәр.
Гомумән алганда, номиналь хуҗаларның ике куркыныч һөҗүменнән тыш, кырда бернинди кызыклы әйбер дә булмады. Икенче тайм интенсиврак узды, «Рубин» уенны үз капкасыннан читкә этте һәм даими һөҗүм итте. Тик менә көндәш, Казанны флангка этәреп, штраф зонасына керергә ирек бирмәде. Мондый тактика яхшы эшләде, куркыныч мизгелләр саны минимумга җиткерелде, һәм матч нульле тигез исәп белән тәмамланды.
Киләсе уенны Слуцкий уенчылары өйдә үткәрәчәк. 8 мартта «Рубин» Самараның «Крылья Советов» командасын кабул итәчәк.
