Питрәч районы Ленино-Кокушкино балалар сәнгать мәктәбендә тәрбияләнүчеләр Брест крепостеның легендар сакчысы һәм Советлар Союзы Герое Петр Михайлович Гавриловка багышланган анимацион фильм төшерәләр. Бу турыда район басмасы хәбәр итә.
Ленино-Кокушкино балалар сәнгать мәктәбе мәдәният һәм сәнгатьоешмаларының иҗат коллективлары проектларына ярдәм итү буенча грант конкурсында җиңү яулады. Алар балалар мультипликация студиясен булдыру турында кызыклы проект әзерләгәннәр һәм 350 мең сумлык грант отканнар. Акчаны республика һәм район бюджетыннан бүлеп биргәннәр.
Мультипликация иҗатчыларының беренче эше Чуар тавык турындагы әкият булган. Аны «Скорлупино» Бөтенроссия фестиваленә багышлаганнар. Әкият артистларын балалар үз куллары белән ясаган, алар рус халык курчакларын, тавык, йомырка, ат, арбалар иҗат иткән. Мультфильм авторлары классик сюжеттан китеп, аз гына үз идеяләрен дә өстәп, картинаны заманчарак иткәннәр.
— Аннары без башка башкару техникасын да сынап карарга булдык һәм комда анимация ясадык. Балалар истәлекле урыннарны үзләре сайлады һәм аларны комда сурәтләделәр, аннары фотога төшерделәр, монтажладылар, — дип балалар иҗаты белән таныштыруны дәвам итә Азат Рәис улы.
Балалар мультфильм өстендә бергә эшлиләр. Алар режиссерлар да, сценаристлар да, рәссамнар да, актерлар да. Хәзер якташыбыз, Брест крепостеның легендар сакчысы, Советлар Союзы Герое Петр Михайлович Гаврилов турында анимацион фильм төшерүгә керешкәннәр. Балалар Әлбәден авылындагы музейда булып кайткан, Брест крепосте фильмын караганнар, шуннан илһамланып, фильм төшерергә керешкәннәр. Эш процессына сигез кеше җәлеп ителгән.
Бу эшне Мәскәүгә мультимедиа технологияләре дөньясында иҗат эшләренең Бөтенроссия конкурсына җибәрәчәкләр.
