Бу киемне гәүдә төзелешеннән чыгып сайлау кирәк.
- • “Груша” рәвешендәге гәүдәлеләргә
Тар иңбашлы, кечкенә күкрәкле, таза ботлы гүзәл затлар бу. Мондыйларга киемнең ботлардан игътибарны читкәрәк юнәлтүе һәм гәүдә-сынның аскы өлешен “җиңеләйтебрәк” калдыруы әйбәт. “Груша”ларга аякка сыланып торган скинни, кыска (тездән түбән) капри-чалбар, озын итәк рәвешендәге афгани һәм джоггер чалбарлар килешми. Алар өчен аскы өлеше киңәеп киткән джинс-клештан да яхшысы юк.
- • “Ком сәгате” рәвешендәге гәүдәлеләргә
Нечкә билле, зур күкрәкле һәм таза ботлы гүзәлкәйләр шундый типка керә. Нечкәбилләрне, аякларга сыланып торучы скинни, шулай ук мом-джинстан (иркенрәк, кайвакыт очлары кайтарылып куелган кыскарак джинс) тыш, югарыда телгә алып үтелгән барлык төр чалбарлар да бизи.
- • “Алма” рәвешендәге гәүдәлеләргә
“Алма” дигәндә, тәбәнәгрәк гәүдәле, уртача яки зуррак күкрәкле, юанрак билле туташ-ханымнар килеп баса. Аларга джинс сайлау – шактый ук авыр эш. Сайлап алынган кием моделе аякларны “озынайтып” күрсәтергә һәм игътибарны билдән читкә юнәлтергә тиеш. Түбән билле, бил өлешендә бизәкле чалбар – “алма”лар өчен түгел. Мондыйларга бот өлеше киңрәк булып, тубык тирәсендә тарайган джинстан да яхшысы юк.
- • “Турыпочмак” рәвешендәге гәүдәлеләргә
Мондый туташ-ханымнарның иңбашы, биле һәм ботлары – чама белән бер үк киңлектә. Аларга түбән билле, бот өлеше киңәеп киткән джинс килешми. “Турыпочмак”лар өчен джинс-скинни, кыска джинс, “бойфренд” (хатын-кызлар фигурасына туры китереп тегелгән ирләр моделе) бик кулай.
Фото: pixabay.com
