«Ак барс» белән «Северсталь» арасында узган матчның төп уенчысы булып Найджел Доус танылды. Канада һөҗүмчесе очрашуда өч алка кертеп, тагын бер мәртәбә иптәшләренә ярдәм итте.
Бер очрашуда өч алка кертү Доус өчен гадәттән тыш хәл түгел. КХЛда мондый уңышка ул инде 10 нчы мәртәбә ирешә. Найджел әлеге күрсәткече белән лигада беренче урында. Казан командасының капитаны Данис Зарипов, мәсәлән, 8 тапкыр хет-трик иясе булган. «Барыс» һәм «Автомобилист»та уйнаганда сезон саен 50–60 һәм аннан да күбрәк очко җыярга гадәтләнгән һөҗүмче «Ак барс»та да иң нәтиҗәле хоккейчыга әверелеп бара. Хәзер аның исәбендә 13 алка бар, моннан тыш иптәшләренә 8 мәртәбә ярдәм иткән. Бу урында аның Казан клубы белән җәй ахырында гына килешү төзегәнен, башкалар белән бергә сезон алды җыенында катнашмаганын, октябрь аенда исә коронавирус аркасында дүрт атна дәвамында бозга чыкмаганын әйтү дә артык булмас.
Казанда «Рубин» белән ЦСКА арасында узган очрашуда исә бердәнбер тупны Джордже Деспотович кертте. Серб футболчысы әлеге очрашуда нибары 25 минут уйнады. Икенче таймда кырга чыгып 3 минут узуга, ул «Рубин»га җиңү алып килгән тупны кертте. Аннары аны башка футболчыга алмаштырдылар. Гадәттә мондый хәл өметне акламаган уенчылар белән була. Деспотовичны исә шул рәвешле имгәнүдән сакларга тырышалар. Чөнки моңа кадәр ул бер ай дәвамында уйный алмады. «Командага әйләнеп кайту өчен бер ай буе тырыштым. Имгәндем, аннары күнегүләрдә катнаша башладым, соңрак тагын имгәндем. Беренче матчта ук туп кертә алганыма бик сөенәм. Инде менә хәзер икенче аягым авырта. Барысы да яхшы булыр дип өметләнәм», – диде ул матчтан соң.
Деспотович «Рубин»да әле җәй көне генә уйный башлады. Быелгы сезонда 7 туп кертеп, Россия премьер-лигасында беренче урында бара. «Яшермим, командада Деспотовичка бәйлелек барлыкка килде. Ул алдагы өч уенда уйнамады, ә без берсендә дә туп кертә алмадык. Бер яктан, бер уенчыга бу кадәр бәйлелек булуы яхшы түгел. Төрле хәлләр була бит. Икенче яктан, аны дәваларга кирәк. Ул – безнең өчен үтә дә мөһим футболчы», – ди «Рубин»ның баш тренеры Леонид Слуцкий.
Илнар Хөснуллин
Телеграмда безнең каналга кушылыгыз: https://t.me/vatantat