«Татарстан Муниципаль берәмлекләре советы» ассоциациясенең яңа рәисе итеп кабат Әгъзам Гобәйдуллин сайланды. Бүген Казанда Муниципаль берәмлекләр советы XV съездында делегатлар аны ачык тавыш бирү юлы белән сайлады, дип хәбәр итә «Татар-Информ«.
Совет рәисе вазифасына Әгъзам Гобәйдуллин кандидатурасын озайтуны сорап, Яшел Үзән районы Түбән Карамалы бистәсе башлыгы Юлия Некрасова мөрәҗәгать иткән иде.
Әгъзам Гобәйдуллин сүз алып, үзенә күрсәткән ышаныч өчен рәхмәтен белдерде. «Минем өчен бу зур горурлык, мәртәбә һәм җаваплылык», — диде. Җирле үзидарә органнары, Татарстан үсеше бәрабәренә нәтиҗәле эшчәнлеккә өметләнүен әйтте.
Ассоциациянең Уставы нигезендә, рәисне вәкаләтләреннән азат итү һәм яңа җитәкче сайлау съездда хәл ителә.
