Дөнья вакыйгаларының иң кайнары һаман да океан артында бара. Байденның инаугурациясе алдыннан АКШта кораллы фетнә чыгу куркынычы килеп чыкты.
Федераль тикшерүләр бюросы (ФБР) 16 гыйнвардан 20 гыйнварга кадәр барлык штатларның башкалаларында да, 17 гыйнвардан 20 гыйнварга кадәр Капитолий янында кораллы протестлар оештырылачагы турында мәгълүматка ия, дигән мәгълүматлар таралды. 16 гыйнвар көнне кораллы бер төркем Вашингтонга юнәләчәк, имеш. Аның әгъзалары, Трампны хакимияттән читләштерү «зур кораллы баш күтәрү»гә китерәчәк, дип белдерәләр. Төркемдәгеләр дәүләт органнарын һәм административ биналарны штурм белән яулап алырга чакыралар.
Рәсми хакимиятләр җитди рәвештә кораллы фетнәгә каршы торырга әзерләнә. Вашингтонга өстәмә рәвештә Милли гвардиянең 15 мең сугышчысы китереләчәк. 10 мең кораллы гвардияче бу шимбәдә үк килеп җитәчәк. АКШның эчке куркынычсызлык министры вазифаларын башкаручы Чед Вульф Яшерен Хезмәтләргә инаугурациянең куркынычсызлыгын тәэмин итү эшенә 13 гыйнвардан керешергә әмер бирде. Дональд Трамп та, Колумбия округының соравын канәгатьләндереп, Байденның хакимияткә килүенең куркынычсызлыгын тәэмин итү өчен төбәктә гадәттән тыш режим кертте.
Американың Дәүләт департаменты сайтында Трампның вәкаләтләре 11 гыйнвардан төгәлләнүе турында язу пәйда булып, Трамп яклыларның ачуын кабартты. Аны департаментның Трамптан риза булмаган бер хезмәткәре элгән диләр. Ак йорттан чыгып китәргә санаулы гына көннәре калган элекке Президентның саубуллашуы шулай җәнҗаллы рәвештә бара. АКШ Конрессының вәкилләр палатасы җирән Президентның импичментын башлап җибәрде. Шунысы кызык: Трамп дилбегәне импичмент игълан ителгәнче тапшырып бетерергә тиеш.
Америкада менә шундый гаҗәп хәлләр бара. Зур империянең нигезләре селкенә һәм какшый. Киләчәктә аңа дөнья гегемоны ролен үтәү авыр булачак.
Дөньяның башка почмакларында да вакыйгалар кайнарлыгы кимеми. Кытай – Тайвань каршылыгы көчәя. Тайвань үз гражданнарының чит ил паспорты тышлыгы бизәлешен алыштырды. Элек тышлыкта Кытай Республикасы дигән сүзләр ярылып ятса, хәзер инглиз телендәге язуда ул сүзләр күзгә ташланмый. Тайвань гражданины дигән сүзләр эре итеп язылган.
Дөньяда коронавируска каршы вакцинация бара. Прививканы иң күп ясаган илләрнең берсе – Израильдә Pfizer вакцинасыннан зарланучылар арта. Икенче дозаны алгач, авыз тәмен югалтучылар, югары температура белән урынга егылучылар, бармаклары оюдан, куллары авыртудан зарланучылар саны бихисап. Үлүчеләр дә булды. Израиль исә әлегә һаман да пандемия иң көчле баручы илләр исемлегендә торуын дәвам итә.
Рәшит Фәтхрахманов
