Декабрь өчен торак-коммуналь хезмәтләргә бәя нигә артып килгән?

Быелның гыйнвар аеннан торак-коммуналь хезмәтләргә бәя артмаячак. Әмма декабрь өчен түләү кәгазьләрендә җылылык, кайнар су, электр энергиясенә бәяләр артып килгән. Республика халкының күбесе әлеге проблема белән Татарстанның Тарифлар буенча дәүләт комитетына мөрәҗәгать итә. Бу хакта сүз комитетның еллык  утырышында да булды.
– Ел башыннан бернәрсәгә дә бәя дә күтәрелми. Әлегә газ бәясе шул килеш – бер кубометры 5 сум 89 тиен булып кала. Ул 1 июльдән 3 процентка артачак. Электр энергиясенә дә хәзер түгел, июль аеннан 4,6 процентка артачак, – диде комитет рәисе Александр Груничев.

Ә декабрь аена килгән квартплата түләүләре ни өчен башка айлардан шактый нык аерыла соң? Казанның Глушко урамында яшәүче Ләйсән Мифтахова, гомер булмаганны, 10 мең сум түләдек, ди. Җылылык өчен 5 мең сум исәпләгәннәр.
– Өебез үзәкләштерелгән система буенча җылытыла. Беркайчан да мондый сумма килгәне юк иде әле. Ирем белән аптырап киттек. Тизрәк идарәче оешмага шалтыраттым. Анда исә үзләренә килүне сорадылар. Барып вакытым гына әрәм булды. Үзләренчә аңлатырга тырыштылар. Мин генә берни аңламадым. Ахырда кәгазьдәге сумманы түләргә туры килде, – ди ул.
Ни өчен бәяләр артып киткән? Татарстанның төзелеш, архитектура, торак-коммуналь хуҗалык министры урынбасары Алексей Фролов бу һава торышына бәйле ди:
– Тариф белән түләү бәясен бутарга ярамый. Тарифта күрсәтелгән бәягә тотылган җылылык күләме тапкырлана. Шулай итеп, түләнәсе сумма килеп чыга. Җылылык күләме арту һава торышына бәйле.

Тарифлар буенча дәүләт комитетының матбугат үзәге хезмәткәрләре дә әнә шушы фикерне җиткерде. Бәя арту турында «Уютный дом» идарәче оешмасы җитәкчесе Марат Нуриевтан да белештек.
–  Бәяләр узган елның җәендә арткан килеш. Декабрь аенда чыгымнар узган елга караганда күбрәк булды. Бәяләрнең артуы шуңа бәйле, – ди ул.
Комитет утырышында Бөгелмә җылылык челтәрләре оешмасы яхшы яктан искә алынды. Тик аларның да проблемалары бар икән. Бу хакта оешма җитәкчесе Азат Хәлимов сөйләде.
– Җылыту биналары тузган хәлдә. Әмма аннан чыгу юлы бар. Безгә шәхси җылыту казаннары куярга кирәк. Җәйге чорда 20 автомат казан куелды. Әлеге эшләрне башкару өчен зур суммада акча кирәк. Аның каравы проект үзен 10 елда аклаячак. Без бөтен җиһазларны читтән алмыйбыз. Безнең илдә җитештергәннәре дә сыйфат ягыннан бер дә калышмый, – ди ул. Әнә шулай итеп, җылылык системаларын яңартмакчылар.
Әлеге дә баягы бәя артуга килсәк, комитет рәисе сүзләренә караганда, республикада эшләүче 23 җылылык белән тәэмин итүче оешмада тарифлар 2021 елда да шул ук килеш кала. Актаныш, Әлмәт, Биектау, Питрәч, Спас районнарында  бәяләр гомумән түбән саклана.
– Халыкны су белән тәэмин итүне республикада 160 оешма башкара. Шәһәрдә яшәүчеләр эчә торган суның 1 кубометры өчен  1 июльдән  ким дигәндә 14 сум 42 тиен түләячәк. Әлеге бәя бер кубометр өчен 51 сум 67 тиеннән артмаска тиеш. Татарстан буенча уртача тариф 26 сум 84 тиен булачак, – диде Александр Груничев.

Торак-коммуналь хезмәтләр өчен тарифлар буенча халыкның соравы кимеми. Узган ел комитетка 3394 мөрәҗәгать килгән. Күбесе «кайнар линия» аша килеп ирешкән. Яшел Үзән, Югары Ослан районнарында куелган тарифларга бәйле сораулар күп. Биектау районында яшәүчеләр исә электр энергиясенә күп түләүдән зарлана. Югары Осланның Раифа авыл җирлегендә су өчен куелган бәягә риза түгелләр.
Закон бозып, торак-коммуналь хезмәтләр өчен халыктан акча җыярга теләүчеләрне контрольгә алачаклар. Узган ел коронавирус пандемиясе аркасында күп кенә планлаштырылган тикшерүләр булмый калган. Әмма Александр Груничев әйткәнчә, былтыр 10 оешмада тикшерү уздырып, юридик затларның – 77, вазыйфаи затларның 65 эшен карап, аларга административ җәзалар бирелгән. Закон бозучыларга 2,7 миллион сум штраф салынган. Быел исә 13 оешмада тикшерү үткәрәчәкләр.
Утырышта торак-коммуналь  хезмәтләр турында сөйләшү белән генә чикләнмәделәр. Транспорттагы бәяләргә дә тукталдылар. Казан, Чаллы, Минзәлә, Түбән Кама, Әлмәт шәһәрендә, Актаныш районында пассажирларны йөртүчеләр өчен тарифлар комитеты бәяне 2020 елда күтәргән булган. Әлегә бәя арту күзәтелмәячәк.
Татарстанның Премьер-министр урынбасары Рөстәм Нигъмәтуллин исә комитет эшчәнлегенә уңай бәя бирде.
– Бакчачылык ширкәтләрендәге электр энергиясе өчен дөрес исәпләмәү очракларына туктатылды. Торак-коммуналь хезмәтләр өчен куелган бәяләрне тикшереп торырга кирәк, – диде ул.
Сүз уңаеннан, «Торак-коммуналь хуҗалык өлкәсен күзәтү төбәк-иҗтимагый үзәге»ндә  җылылыкка түләү буенча сораулары булган кешеләр өчен 8(843) 236–29–97 номеры буенча «кайнар линия» эшли башлады.

Гөлгенә ШИҺАПОВА

Фото: kazved.ru