Марат Әхмәтов: «Туган телне саклау өчен әти-әниләр белән эшләргә кирәк»

Татарстан Дәүләт Советы Рәисе урынбасары, Президент каршындагы Татар телен саклау һәм үстерү мәсьәләләре комиссиясе җитәкчесе Марат Әхмәтов Теләче районында туган телләргә багышланган “түгәрәк өстәл”дә әнә шулай диде. Чарага Казан арты районнары җитәкчеләре, мәгариф, мәдәният бүлеге белгечләре җыелган иде.

Кунаклар иң элек район үзәгендәге “Кояшкай” балалар бакчасы, Теләче урта мәктәбе, мәдәният йорты, китапханә эшчәнлеге белән танышты. Шулай ук “Батыр” спорт комплексында милли көрәш буенча РСФСРның спорт остасы, танылган фермер Сәгыйть Гыйниятуллин призына үткәрелүче татарча көрәш ярышларын ачу тантансының шаһиты булдылар. Халыклар бердәмлегенә багышланган концерт карап, бергәләшеп “Туган телне” җырладылар.
Марат Әхмәтов Теләче районындагы вазгыятьне уңай бәяләде. Мәгариф, мәдәният оешмаларындагы эшчәнлектән канәгать калуын, туган телләрне саклауда район башлыгының мөнәсәбәте уңай булуын әйтте.

–Мәгариф учреҗдениеләрендә төп проблема – әти-әниләр белән эшләү. Татарстанда яшибез, мохит бар дисәк тә, зур дәүләт күзлегеннән караганда, рухи ихтыяҗның әле сай булуы сизелә. Бигрәк тә яшь әти–әниләрдә балаларын бакча һәм мәктәпләргә биргәндә, татар теле киләчәктә кирәк булырмы, дигән фикер яши. Алар күбрәк рус телендә укыту һәм тәрбия бирүне максат куя. Татар телендә белем һәм тәрбия бирсәң дә, баланың үсеше тоткарланмый, киләчәктә отышлырак та булачак. Безгә әти-әниләргә шушы фикерне сеңдерергә кирәк. Мәгариф оешмалары җитәкчеләре өчен бу – зур бурыч. Нәтиҗә ясаганда, нәрсәләргә ирештек, телнең әһәмиятен җиткерә алабызмы, шул хакта да сөйләшәчәкбез, –диде ул.