Үзебезне генә түгел, янәшәдәге өлкәннәрне дә кайгыртыйк. «Татар-информ» мәгълүмат агентлыгында узган матбугат очрашуында бу сүзләрне еш ишетергә туры килде.
Башкача мөмкин дә түгел. Республикада көн саен теркәлеп торган саннардан күренгәнчә, коронавирус йоктыручыларның яртысыннан артыгын 60 яшьтән өлкәнрәкләр тәшкил итә.
– Шуңа күрә коронавируска каршы вакцина ясатуга өлкәннәрне дә җәлеп итәргә кирәк. 60 яшьтән узганнарның барысы да авыру янаучы төркемдә, – ди Роспотребнадзорның Татарстан буенча идарәсе башлыгы Марина Патяшина.
Берничә көн элек Апаста яшәүче Илгиз Әхмәтҗановның әтисе дә коронавируска каршы вакцина ясаткан. «Әти быел 60 яшен тутыра. Узган ел бу чир белән бик күп туганнарыбыз авырды. Хатыным да бер ай буе ис-тәм сизмичә йөрде. Үлем-китем очраклары да булды. Шуңа әти вакцинаны ясатырга булды. Үзе теләп. Аның хроник чирләре бар. Андый кеше коронавирус эләктерә калса, бигрәк тә авыр кичерә, диләр бит. Аллага тапшырган», – ди әңгәмәдәшем. Илгиз үзе вакцина ясарга өлгермәгән әле.
Белгечләр исә сәламәтлекне кайгыртуны үзебездән башларга чакыра.
– Коронавируска каршы вакцинаны иң элек үзебез ясатсак, бу чирнең йортларыбызга үтеп кереп, якын кешеләребезгә йогу ихтималы да бермә-бер кими, – ди Татарстан сәламәтлек саклау министры урынбасары Владимир Жаворонков. Рәсми саннарга караганда, бүген республикада 81750 кеше вакцина ясаткан. 13732 икенче доза алган. – Вакцинаның икенче дозасын вакытында ясатырга өлгермәсәң, борчылырга кирәкми. Беренче ясату белән икенчесе арасында 21 көн вакыт узарга тиеш дигән төгәл таләп юк. Бу кагыйдәне истә тотарга кирәк, билгеле. Әмма берничә көн соңрак ясатсаң да зыяны юк.
Соңрак димәктән, Татарстанда коронавирус белән бәйле чикләүләрнең
кайчан юкка чыгачагы да 8 Март бәйрәменнән соң гына билгеле булачак.
– Бәйрәм алдыннан гына чикләүләрне бетереп кую урынсыз, килешәсездер. Юкса, язгы күтәренке кәефтән башлар әйләнеп, бәйдән «ычкынуыбыз» бар. Шуңа күрә бу сорауны бәйрәмнәрдән соң – гадәти эш режимына әйләнеп кайткач карарбыз, дип ышандырды Марина Патяшина.
Атна-ун көн элек Россиядә коронавирустан өченче вакцина теркәлде. Аның республикага кайчан кайтачагы, кемнәргә иң беренчеләрдән булып ясалачагы да соңрак билгеле булачак, диде белгечләр. Кыскасы, коронавирус, вакцина тирәсендә эленеп калган иң мөһим сорауларга бәйрәмнән соң җавап алыначак.
Динә Гыйлаҗиева
Илдар Мөхәммәтҗанов фотосы
