Берничә кешенең гомерен алып киткән янгын Колшәрип авылының Чапаев урамындагы бүрәнәдән салынган 100 кв м мәйданлы шәхси йортта чыга. Бу хакта хәбәр 101 номерына төнге сәгать 3 тә килеп ирешә. Чарасын тиз күрәләр үзе. Әмма, кызганычка, соң була инде. Янгынны сүндергән вакытта ук бер ир-атның үле гәүдәсенә тап булалар. Ә сүндереп бетергәннән соң иртәнге якта икенче бер ир-атның гәүдәсен, өченчесенең кайбер өлешләрен табалар.
Бу йортта имин булмаган гаилә яшәсә дә, өч кешенең үлеме авыл халкын шок хәлендә калдырган. Авыл җирлеге белән элемтәгә кергәч, безгә түбәндәге хәлләрне бәян иттеләр. “Бу йортта яшәгән Латыйповлар имин булмаган гаилә буларак исәптә тора. Инде моннан бер ел элек, күршеләренең гаризасы буенча, Яңа ел бәйрәменә каршы участковый белән безгә дә барырга туры килгән иде, — дип сөйли җирлектә эшләүче белгечләр. – Ул вакытта ук хәтта торбаларны да кисеп, соңгы тимер-томырга кадәр сатып бетергәннәр иде. Өйләрендә биш ел тирәсе газ янмый, өзелгән. Шуңа күрә буржуйка белән җылытып маташалар иде. Шуннан бирле гел контрольдә тоттык. Җирлек башлыгы Альберт Кашафетдинов бу вазыйфага узган елның сентябрь аенда гына кереште. Беренче көненнән үк бу йорт аның күз уңында булды. Әле бер атна элек кенә участковый белән барып кайтты. Элек органнарда да эшләгән кеше булгангамы, мондый күренешләргә бик җаваплы карый. Андагы хәлләрне күреп, бик борчылып, хәтта сарайларына кадәр сүтеп, утынга сатып бетергәннәр, дип сөйләде”.
Хәзер янгын урынында экспертлар ярдәме белән үлгән кешеләрнең кем икәнлеген ачыклау процессы бара. Аларның берсе — йорт хуҗасының абыйсы Рафик Латыйпов булып чыккан. Ә йорт хуҗасы Әхнәф Латыйпов исән-имин килеш табылган, Кәләй нефть участогында эшләү сәбәпле, бу төнне шунда кунып калган. Хуҗабикә Лилияне дә исән-сау күрергә өметләнәләр. Ул Әлмәттә психоневрология хастаханәсендә эшли, еш кына төн кунарга да шәһәрдә кала икән. Экспертлар әйтүенчә, үлгәннәр арасында хатын-кыз гәүдәсе юк. Шуңа күрә дә авыл халкы Рафик Латыйпов дус-ишләре белән эчеп утырганнардыр дип фаразлый, чөнки ул шактый вакыт шушы йортта яшәгән. Күптән түгел генә Латыйповларның 1992 елгы бер уллары да төп нигезгә кайткан. Ул Түбән Камада колониядә утырып чыкканнан соң өйләнгән булган, озак вакыт шунда яшәгән. Күрәсең, тормышлары барып чыкмаган. 1998 елгы тагын бер улларының бу вакытта кайда икәнлеге билгеле түгел. Әлегә янгын чыгу сәбәпләре дә документлаштырылмаган. Авыл халкы зур борчылу белән, кайсы гаилә өстенә төшкән бәла икән дип, җансыз гәүдәләрнең кемнеке икәнен ачыклауларын көтә.
Фәния Әхмәтҗанова
ФОТО: https://mchs.tatarstan.ru/
ЗуайраУраза вакытында Кан бирергэ туры килэ,ярыймыУраза турында 9 сорауга ҖАВАП
Загрузка ...
