Татарстанда прививка ясатуга каршы булган һәр дүрт кешенең берсе бу фикереннән кире кайта. “Татар информ” агентлыгында узган матбугат очрашуында Татарстан буенча Роспотребнадзор идарәсе башлыгы Марина Патяшина шулай дип белдерде.
“Без ел саен 15 меңләп вакцинадан баш тарту очрагын тикшерәбез. Аны ясатудан баш тарткан һәр дүрт кешенең берсен бу фикереннән кире кайтаруга ирешәбез”, – диде ул журналистларга.
Патяшина китергән мәгълүматларга караганда, Татарстанда ел саен якынча 60 меңләп кеше прививка ясатудан баш тарта. Шул ук вакытта республикада ел саен 2 миллион кеше вакцина ясата.
