Татарстанга туристларны җәлеп итүнең яңа ысулын уйлап тапканнар. Ул гына да түгел, әлеге ысул яшь буынны мәдәни һәм тарихи мирасыбызга якынайтачак. «Татар-информ» мәгълүмат агентлыгында матбугат очрашуында шушы бурычларга хезмәт итәчәк «Минем Татарстаным» бәйгесе турында сөйләштеләр.
Бәйгенең тагын бер зур әһәмияте бар: безнең күпмилләтле һәм бердәм булуыбызны күрсәтү.
– «Яңарыш» фондына нигез салынганда, Минтимер Шәрипович болай дигән иде: «Безнең эшләгән һәр эшебез – киләчәк буыннар өчен. Безнең тарих – алар кулында». Бүген дә без яшьләрдә мәдәни, тарихи мирасыбызга карата кызыксыну уяту белән шөгыльләнәбез. Моның өчен яңа алымнар кулланабыз, яшьләргә яшьләр теле белән мөрәҗәгать итәргә тырышабыз. Әлеге бәйге дә – шуңа бер мисал, – дип сөйләде Татарстанның Дәүләт Советы Рәисе урынбасары Татьяна Ларионова.
«Минем Татарстан» («Родной Татарстан») бәйгесе Татарстанның «Туризм волонтерлары ассамблеясы» тәкъдиме белән үткәрелә. Аның асылы нидә соң?
– Бәйгенең төп таләбе – өч тел кулланып, Татарстанның теләсә кайсы почмагына чакырып, видео төшерү. Үз авылыңа яки шәһәреңә чакырасыңмы – мөһим түгел, чөнки республикабызда күрсәтердәй урыннар шактый. Иң мөһиме – ул урын турында кызыклы итеп сөйли белү. Катнашучылар өчен тагын бер таләп: өч телнең берсе татар теле булырга тиеш. Калганнары урыс, мари, чуаш, инглиз һәм башка телләр булырга мөмкин. Видео-чакыру бер минуттан артмасын, – дип аңлатты «Туризм волонтерлары ассамблеясы» җитәкчесе Юлия Бәширова.
Оештыручылар сүзләренчә, видео аша якын күршеңне дә, Россиянең башка төбәкләрендә яшәүчеләрне дә чакырырга мөмкин. Димәк, өч телдә мөрәҗәгать итеп, бер минутлык видео-чакыру төшерәсең һәм шул чакыруны «Тик-Ток» аша таратасың. Чакыруың популяр була икән, киләсе турга үтәчәк. Иң яхшы ун эш арасыннан берничә җиңүчене Алабуга музей-тыюлыгына сәяхәт көтә.
Кемнәр һәм кайчанга кадәр катнаша ала соң? Бәйгегә 1–11 сыйныфларда укучыларның эшләре кабул ителә. Ә видео-чакыруларны 30 апрельдән 19 сентябрьгә кадәр урнаштырырга мөмкин булачак.
Лилия Гыймазова
Фото: pixabay.com
АйгульАешта су коточкыч. Бер ике тарелка б.н бер ике кружка юсан,кулдан карасы бер атнасыз бетми.«Эчәр суым – кара мазут»: Аеш авылында суның сыйфатына зарланалар
Загрузка ...
