1 июльдә Кировның Грибоедов урамындагы аквапаркта су коенган вакытта 11 яшьлек малай батып үлгән. Тикшерүчеләр җинаять эше кузгаткан.
Әлеге фаҗиганең нечкәлекләре әлегә билгеле түгел. Тикшерү комитеты сайтында хәбәр ителгәнчә, бу хәлдән соң тикшерүчеләр урынга чыгып киткән. Алар фаҗига урынын караган һәм шаһитлардан сораштыру уздырган. Шулай ук видеокүзәтү камераларыннан язмалар алынган. Суд-медицина экспертизасы билгеләгәннәр.
Шунысын да билгеләп үтәргә кирәк, бу аквапарк күзәтчелек органнары игътибарына эләкккән булган. Февраль аенда анда балалар һәм өлкәннәр хлор пары белән агуланган иде.
