Татарстанлылар арасында, 8 ноябрьдән балалар бакчаларына бары тик QR-код белән генә кертәчәкләр икән, дигән сүзләр таралды. Имеш-мимешләргә республиканың Мәгариф һәм фән министрлыгы ачыклык кертте.
– Әлеге мәгълүмат дөреслеккә туры килми. Башка моны таратмауны сорыйбыз. Министрлык балалар бакчасы территориясенә бары тик QR-код белән генә кертергә дигән күрсәтмә бирмәде, – дип хәбәр итә ведомство.
Роспотребнадзор күрсәтмәсе буенча, балалар бакчасына, элеккегечә үк, битлек киеп, баланың һәм әти-әнинең температурасын үлчәп һәм социаль дистанция саклап кына кертәләр.
Ә менә утренникларга, чыннан да, QR-коды яки авырганлыгын дәлилләүче белешмәсе булганнарга гына керергә рөхсәт ителәчәк. Бәйрәмдә бары тик әти яки әни генә катнаша ала. 60 яшьтән өлкәнрәкләр, гаиләдәге башка балалар утренникларда шулай ук катнаша алмаячак.
