Тотса «омикрон» якаң…

Быел кычкырмас өчен, былтыр нишләргә кирәк иде? Белгечләр, вакцина ясатасы, ди. Вазгыятьнең тотрыклылыгы саклансын, иммунитетның чиргә каршы торучанлыгы артсын өчен кирәк бу. Ә бит ике ай дәвамында чир йоктыручылар саны кимегәннән соң, республикада коронавирус белән авыручылар тагын арта башлаган.

– Узган елдан ук авыручылар саны кимүен күзәтеп килдек. Әйтик, чирләүчеләр саны 8, 20, 40 процентка кадәр кимегән атналар булды. Үткән атнада бу кимү акрынайды һәм нибары 10 процентны тәшкил итте. Гыйнварның беренче көннәрендә чирләүчеләрнең 8 процентка артуын күзәтәбез. Бу көтелгән иде. 6 атналык кимүдән соң үсеш башланды, – диде Роспотребнадзорның Татарстан буенча идарәсе башлыгы урынбасары Любовь Авдонина.

COVID-19 белән бер чирләүчеләрдән тыш, грипп белән авыручылар саны да шактый.

– 544 очрак теркәлде. Пандемиягә кадәр чор белән чагыштырганда, рекордлы сан бу. Саклану чараларын күрүегезне сорыйбыз, – дип кисәтте Любовь Авдонина.

Шушы ике мәгълүматтан чыгып та, гамәлдә булган чикләүләрне юк итү турында сүз алып барылмавын аңларга мөмкин инде. Любовь Авдонина да: «Эпидемиологик вазгыятьне катлауландырмас өчен, чикләүләр сакланачак», – диде. Бу – Татарстанның ресторатор һәм кунакханә хуҗаларының эш вакытына  үзгәрешләр кертүгә бәйле мөрәҗәгатенә дә кагылачак. Шунысы куандырмый калмас: Роспотребнадзор тикшерүләрне арттырмаска өметләндерде. Хәер, анысы – ике яклы мәсьәлә. Авыру йоктыргач, штрафы да, башкасы да мөһим түгел инде.

Татарстанның сәламәтлек саклау министры урынбасары Владимир Жаворонков коронавируска каршы вакцина ясатуга бәйле вазгыять турында сөйләде. Төгәлрәк әйткәндә, аны 200 меңнән артык кешенең кабат вакцина ясатырга килмәве борчуга сала икән.

– Хәзерге вакытта ревакцинацияне 147240 кеше узган. Узган елның июлендә, ягъни 6 ай элек, коронавируска каршы прививканы 382697 кеше кадаткан. Алар кабат вакцина ясатырга тиеш. Тик 235457 кеше һаман да прививкасыз, – диде ул.

Министр урынбасарын 65 яшьтән өлкәнрәкләрнең хәле аеруча борчый. Аларның 571794е – вакцинаның беренче дозасын, 418524е исә икенчесен алган. Пенсия яшендәгеләрнең гомуми санының 67 һәм 46 проценты дигән сүз бу. Владимир Жаворонков әлегә кадәр вакцина ясатмаган өлкәннәрне уйланырга чакырды. «Чир йоктырган очракта да, вакцинасы булганнар аны җиңелрәк кичерәчәк», – дип искәртте ул.

Гомумән алганда, Татарстанда коронавируска каршы вакцина ясатучылар саны 2311783 кешене тәшкил итә. Бу – халык санының 75,9 проценты дигән сүз.

Балалар вакцинасына бәйле кызыксыну да кимеми. Узган елның ноябреннән бирле сөйләнелә торган вакцина республикада әлегә юк. Владимир Жаворонков сүзләренчә, кайтартылгач, аны ничек файдалану һәм эшне ничек оештыру турында фикер алышалар. Бәлки, вакцина ясату сәүдә үзәкләрендә узар дигән фараз да бар.

Хәзер «омикрон» сүзе дә халык теленнән төшми. Бар игътибар инфекция таралган чит илләргә төбәлгән. Роспотребнадзор белгече яңа штаммның үзенчәлекләрен атады.

– «Дельта» штаммына караганда, «омикрон» җиңелрәк уза. Аның да үзенчәлекләре бар. Иң элек, бу – таралу тизлеге. Әйтик, ябык урында ул 4 мәртәбә тизрәк тарала. Авыру билгеләренә килгәндә, температураның 38гә кадәр күтәрелүе, тамак, буыннар авыртуы, борын тыгылу. Әлегә Татарстанда «омикрон» йоктырган кеше юк. Шул ук вакытта «дельта»ның да юкка чыкмавын истә тотарга кирәк, – дип аңлатты Любовь Авдонина.

Владимир Жаворонков әйтүенчә, «омикрон» турында сөйләгәндә һәм чит ил белән чагыштырганда, анда вакцина ясатучыларның саны Россиядәгегә караганда күбрәк булуын исәпкә алу мөһим.

–  «Омикрон»ның җиңелрәк узуы турында сөйлибез, чөнки чит илдә халыкның күпчелеге вакцина ясаткан. Ягъни авыруның җиңел үтүе штаммның аерым үзенчәлеге дә, эпидемиологик «калкан» барлыкка килү нәтиҗәсе дә булырга мөмкин, – дип аңлатты белгеч.

Россия Хөкүмәте QR-кодка бәйле закон проектын кичектерергә уйлаган. Бу хакта вице-премьер Татьяна Голикова хәбәр итте. Аның сүзләренә караганда, закон проекты беренче укылышта «дельта» штаммы таралуга каршы тору чарасы буларак әзерләнгән иде, ә хәзер бурычлар башка.