Чаллының «Күңел» радиосы инде чирек гасыр дәвамында 92,6 ешлыгы аша көн саен Кама аръягы төбәгендә яшәүчеләрне сәламли. Аларны радиоалгыч аша гына түгел, концертлары аша да яхшы беләләр. Тиздән «Күңел» Казан тамашачысы белән дә очрашачак. Радионың киләчәккә уй-ниятләре, рекордлары һәм яшь алып баручылары турында «Күңел»нең җитәкчесе Лилия Мәхмүтова белән сөйләштек.
– Лилия ханым, тиздән «Күңел» радиосы Казан тамашачысына үзенчәлекле концерт тәкъдим итәчәк. Шул концерт турында сөйләгез әле.
– Быел радио үзенең 25 еллык юбилеен уздыра. Шул уңайдан республиканың төрле районнарына барып, концертлар куярга карар кылдык. Үзебез тирәдәге генә түгел, әлегә безнең ешлык тотмаган районнарга да барасыбыз килде. Бу ниятебезне беренче булып Арчада тормышка ашырдык – җәйге кичтә урам концерты оештырдык. Аннан, уйлаштык-уйлаштык та, Казанга да барып кайтырга кирәк дигән фикергә килдек. Казан тамашачысының зәвыклы икәнен бик яхшы беләбез, шуңа да гади концерт түгел, үзенчәлекле тамаша әзерләдек. Шулай итеп, 26 октябрьдә «Уникс» концертлар залында шәһәр халкын һәм кунакларны яшьлек елларына алып кайтачакбыз. Концертта һәркемгә якын һәм таныш булган җырлар яңгыраячак. Әти-әни канаты астында узган гамьсез чакларны искә төшерү, шушы вакытларга берничә сәгатькә булса да кайтып килү ниятеннән уздырабыз без ул концертны.
«Безнең яшьлек җырлары» концертында халкыбызның яраткан артистлары Зәйнәб Фәрхетдинова, Зөфәр Билалов, Эльвира Хәйруллина, Рөстәм Закиров, Гөлдания Хәйруллина, Сәгыйть Гыйбашев, Асаф Вәлиев, Асылъяр, Рәсим Низамов, Зөһрә Шәрифуллина, Айрат Гомәров, Илназ Минвәлиев, Зөлфирә һәм Алмаз Мирзаяновлар, Рамил Миндияр, Зөфәр Хәйретдинов, «Айфара» төркеме, «Мунча ташы» эстрада театры, Руслан Кираметдинов, Әлфинә Әзһәмова һәм Казан тамашачысы өчен иң зур бүләк – Дәниф Шәрәфетдинов катнашачак.
Катнашучыларны кемнең нинди артист булуына түгел, нинди җыр башкарачагына карап сайладык. Чыгыш ясаучылар арасында яшьләр дә бар. Алар 80–90 нчы елларда популяр булган җырларны башкарачак.
– Юбилей, димәктән, «Күңел» 25 еллыгын нинди нәтиҗәләр, уй-ниятләр белән каршылый?
– Нәтиҗәләрне без һәр сезон саен ясыйбыз. Барын да уртага салып сөйләшәбез. Булган проектларга бәя бирәбез, яңалары турында уйлыйбыз. Шушы еллар дәверендә шуны аңладык: тыңлаучылар үзгәрә, шуңа күрә без дә үзгәрергә тиеш. Уй-ниятләргә килгәндә, моннан биш ел элек безнең радио Кама аръягы төбәге өчен генә эшләсә, хәзер безне Мамадыш, Арча, Буа һәм Биектау районнарында да тыңлыйлар. Киләчәктә исә, моның белән генә чикләнмичә, үз ешлыгыбызны республиканың башка районнарында да булдырырга, тыңлаучыларыбызны арттырырга телибез. Безгә бу турыда язучылар да, онлайн тыңлаучыларыбыз да шактый. Шуларны бер йодрыкка туплыйсы иде.
– Сез бит әле юбилей уңаеннан радиомарафон уздырып, Гиннесс рекордлар китабына да керергә җыенган идегез.
– Әйе, җәй көне без 30 сәгатьлек радиомарафон уздырдык. Башта гел барып чыкмас төсле тоелган иде ул. Безгә бит һәр сәгать саен, хәтта төнлә дә кунаклар килде. Тыңлаучылар да шушы вакыт дәвамында безнең белән булды. Башка редакцияләрдә эшләүчеләр җылы ашлар, чәйләр китерде. Шулай итә-итә, ерып чыктык без аны. Хәзер инде 60 сәгать тә куркытмый кебек (көлә). Ялгышмасам, рус телле радиоларның берсе нәкъ шундый рекорд куйды. Без исә аны да арттырырга тиеш булабыз. Бу ниятебезне яңа елга кадәр тормышка ашырырга насыйп булса ярар иде. Рекордлар китабына ук кереп булмас, әмма үзебезне сынап карыйсыбыз килә. Алып баручыларыбыз 40 сәгатькә түзәрме, 50гәме – күрербез. Насыйп булса, рекордын да куярбыз.
– Белүемчә, «Күңел»дәге алып баручыларның күбесе – яшьләр. Үзләре киләләрме, сез чакырасызмы?
– Элеккеге состав алышынганнан соң, «Күңел»гә яшьләр килде. Заманасы да шуны таләп итә бит. Яшьләр һәрдаим килеп тора, кастингларны инде оештырмыйбыз да. «Сездә эшлисем килә», – дип киләләр. Аларның кызыксынуы танылу теләге белән бәйлеме, әллә күңел халәтләре шундыймы – анысын белмим. Әмма мондый теләк белдерүчеләрнең күп булуы, әлбәттә, сөендерә генә. Хәзерге вакытта «Күңел» радиосын 3 миллионлап кеше тыңлый. Элек күбесенчә өлкән яшьтәгеләр тыңласа, хәзер тыңлаучыларыбыз арасында яшьләрнең саны арта. Кыскасы, безнең «Күңел» елдан-ел яшәрә.
– Чаллы белән Казан арасында шактый чакрымнар ята. Бу ике шәһәрнең тамашачылары, тыңлаучылары да бер-берсеннән шактый аерыла, диләр. Килешәсезме?
– Чаллы тамашачысы татар мәдәнияте үзәгеннән читтәрәк булгач, аның татар җырына, моңына сусавы көчле. Шуңа да алар татарча концертларны зарыгып көтеп ала, зал тутырып йөри, татар җырларын да йотлыгып тыңлый. Төп аерма шулдыр, миңа калса. Җырчылар да шулай ди.
Әңгәмәдәш – Лилия Гыймазова
