Бүген Татарстан Республикасы Хөкүмәте Йортында «Татнефтехиминвест-холдинг» АҖ Директорлар советы утырышы узды. Утырышны Татарстан Президенты Рөстәм Миңнеханов үткәрде.
Директорлар советы әгъзалары һәм чакырылганнар берничә инновацион проект карадылар.
НИИЭМИдә яңа эластомер материаллар һәм махсус техника өчен эшләнмәләр эшләнгән. Бу хакта Эластомер материаллар һәм эшләнмәләр фәнни-тикшеренү институты (Мәскәү) генераль директоры Дмитрий Резниченко хәбәр итте. Авиация һәм космик техника, атом сәнәгате, радиоэлектроника суыту системалары өчен резина катнашмалар булдырылды.
Нотыкчы билгеләп үткәнчә, Россиядән «көнбатыш лобби» киткәннән соң, үзебезнең стандартлаштыру программаларын, аерым алганда, резинотехника сәнәгате өчен эшләргә кирәк.
«Бу тема технологик иминлек өчен бик мөһим, өстәвенә, бу яхшы бизнес», — дип бәяләде аның нотыгын Татарстан Президенты Рөстәм Миңнеханов һәм Татарстан предприятиеләре белән суднолар төзү, авиатөзелеш һәм автосәнәгать белән хезмәттәшлекне җайга салырга тәкъдим итте.
Синтетик полимер материаллар институты җылылыкка чыдам полимерларны (полиимидларны) тикшерү өчен инвесторлар эзли. Бу хакта РФАнең С. Н Ерколопов исемендәге ИСПМ директоры Сергей Пономаренконың нотыгында әйтелде. 50-100 млн сумлык сынау җитештерүен 2025 елга башлап җибәрергә мөмкин.
Супер пластмассадан сыгылмалы кояш панельләре өчен тасма чыгарырга мөмкин. Полимидлар шулай ук аэрокосмик техника, электротехника һәм микроэлектроника җитештерүдә кулланыла. Рөстәм Миңнеханов «Татнефть» ГАҖ һәм Казан федераль университетына әлеге проектта катнашырга тәкъдим итте.
Сергей Пономаренко шулай ук Татарстанда фән һәм индустрия арасында хезмәттәшлекне җайга салу өчен эксперт үзәге булдырырга тәкъдим итте.
Россиядә техник (наркотик булмаган) киндер үстерү һәм эшкәртү тармагын торгызу тәкъдим ителә. Бу фикерне КНИТУ-КХТИ профессоры Тимур Дебердиев нигезләде. Дөньяда аннан 25 меңгә якын төр продукция җитештерелә – кәгазь, биодеградацияләнә торган савыт-саба һәм май, текстиль, төзелеш, лаклы буяу һәм композит материалларга, шулай ук дару препаратларына кадәр.
Татарстан Президенты проектка ярдәм итәргә вәгъдә бирде. «Казан дары заводына да зур ихтыяҗ бар, — дип искәртте ул. — Без күп күләмнәрдә эшли алабыз. Моның өчен техника һәм орлык материалы мәсьәләләрен өйрәнергә кирәк. Оборона сәнәгате өчен бу стратегик материал».
Россиядә җитештерү бурычларын хәл итү өчен чит ил ERP-системаларына алмаштыру булдырылган, дип сөйләде «ИТЕРРА-ИТ» ҖЧҖ (Тула) операцион директоры Сергей Редько. Ул искә төшергәнчә, Россия Федерациясеннән SAP, Aracle һәм Microsoft компанияләре китте. Аларның Россия базарында көндәшләре юк диярлек. Илебезнең «ИТЕРРА» модуле продукция чыгаруны арттырырга, җитештерүдә брактан котылырга һәм җитештерү процессын үтә күренмәле итәргә мөмкинлек бирә.
Моннан тыш, «Татнефтехиминвест-холдинг» АҖ Директорлар советы утырышында 2023 елда Татарстанның кече һәм урта предприятиеләренә җибәрү өчен углеводород чималы һәм нефть химиясе продукциясе исемлеге расланды. «Кытлык позицияләре бар иде, әмма 2022 елгы программа тулаем уңышлы үтәлде», — дип билгеләп үтте холдингның генераль директоры Рафинат Яруллин.
Россия нефть һәм газ компанияләренә Азиядән читтә дә яңа базарлар эзләргә кирәк. Мондый тәкъдим белән Россия Нефть-газ сәнәгатьчеләре берлеге президенты Геннадий Шмаль чыгыш ясады. «Катлаулы заманга карамастан, безнең нефть-газ комплексы исән әле, — диде ул. — Нефтьчеләр бу ел нәтиҗәләре буенча 539 млн тонна нефть чыгарырга җыена. Бу узган ел белән чагыштырганда да күбрәк».
Шмаль һәм Россия торбаүткәргеч газын Көнбатыш илләренә илтеп җиткерүгә бәйле проблемаларга аңлатма бирде. Ул Европа сәясәтчеләрен социаль объектларны җылысыз калдырырга әзер булганнары өчен тәнкыйтьләде. «Минем өчен 21 гасырда Ауропа илләрендә җылыту булмавы аңлашылмый, — дип белдерде ул. — Шуңа күрә безнең бурыч — үзебезне [чимал] белән үзебез тәэмин итү».
Нефть-газ сәнәгатьчеләре берлеге президенты ассызыклаганча, тармак үсеше өчен геологик разведканы торгызырга кирәк.
