Россия Президенты Владимир Путин митинглар, демонстрацияләр, җыелышлар һәм йөрешләр оештыру тыелган урыннар исемлеген киңәйтте. Документ хокукый мәгълүматның рәсми порталында чыкты.
Бу тыю гаммәви хакимият органнары, югары уку йортлары, мәктәпләр, чиркәүләр һәм алар янындагы территорияләр, аэропортлар, вокзаллар, портларга, шулай ук башка биналарга кагыла.
Моннан тыш, электр, җылыту, суүткәргеч һәм газ челтәрләре эше өчен кирәк булган әһәмиятле объектлар территорияләрендә мондый чаралар оештырырга ярамый.
Исемлекне Россия төбәкләре хакимиятләре дә тулыландыра ала.
Исегезгә төшерәбез, мондый исемлек элегрәк тә бар иде: аңа Россия Президенты резиденцияләре, судлар, ашыгыч хезмәтләр һәм Россия Федерациясе Җәзаларны үтәү федераль хезмәте учреждениеләре биналары кертелгән.
