Татарстан Рәисе Рөстәм Миңнеханов “Турыдан-туры чит ил инвестицияләренең халыкара трендлары: Россия һәм Ислам хезмәттәшлеге илләренең роле” дип аталган эшлекле иртәнге ашта катнашты.
Чараны Берләшкән Гарәп Әмирлекләрендә ел саен үткәрелүче инвестиция форумы җитәкчелеге тарафыннан оештырылган. Ул «Россия – ислам дөньясы: KazanForum 2023» XIV Халыкара икътисадый форумы кысасында уза.
Рөстәм Миңнеханов оештыручыларга рәхмәт сүзләрен җиткереп, республиканың ел саен Берләшкән Гарәп Әмирлекләрендә узучы форумда катнашуын әйтте.
– Без чит илдәге хезмәттәшләребездән күп нәрсәгә өйрәнәбез. Бигрәк тә, инвестицияләр җәлеп итү, ислам банкингын үстерү, хәләл-индустрия кебек юнәлешләр кызыклы. Аларның барысы буенча да ике арада яхшы элемтәләр урнашкан, – диде Рәис.
Берләшкән Гарәп Әмирлекләренең тышкы сәүдә министры Тани Әл-Зейуди Россиянең, аерым алганда, Татарстанның төп хезмәттәшләренең берсе булуын билгеләп үтте.
– Республикага өченче тапкыр киләм һәм төбәкнең ни дәрәҗәдә тиз үсүен күреп торам, – диде ул.
Катарның сәнәгать һәм сәүдә министры урынбасары Солтан Бин Рәшит Әл-Хәтер билгеләп үткәнчә, “KazanForum” мәйданы хезмәттәшлекне тагын да ныгытырга ярдәм итә.
