Бу атнада Татарстанда бераз гына явым-төшемле салкынча һава көтелә.
Гидрометеоүзәк хәбәр иткәнчә, сишәмбе һәм чәршәмбедә көндез термометрның терекөмеш баганасы +19… +24 градус күрсәтәчәк. Төнге сәгатьләрдә +6…+12 градус. Төбәкнең күпчелек өлешендә явым-төшем көтелми. Бүген – 6 июньдә көндез көньяк-көнчыгыш районнарда гына яңгырлар явып үтәчәк.
Пәнҗешәмбе – 8 июньдә иртән һәм көндез урыны белән яшенле, көчле җилле яңгыр көтелә. Һава температурасы +24 градуска кадәр күтәреләчәк. Төнлә исә +7…+12 градус.
Алдагы ике тәүлектә һава торышы әлләни үзгәрмәячәк. Көндез һава температурасы +18…+23 градуска кадәр күтәреләчәк. 9 июньдә – күпчелек районнарда, 10июньдә – урыны белән аз гына яңгыр явып үтәргә мөмкин.
