Татарстан Премьер-министры Алексей Песошин «Казан Экспо»да «Бөтенроссия кыр көне – 2023» кысаларында үткән X җир сөрү буенча ачык чемпионатның ябылу тантанасында катнашты. Бу хакта ТР Рәисенең матбугат хезмәте хәбәр итә.
Песошин чемпионатның соңгы атнада якты вакыйга булуын билгеләп үтте. «Кырда без илнең иң яхшы механизаторы исеме өчен намуслы һәм матур көрәш күрдек. Ярышлар тәҗрибәле катнашучыларга яңа үрләр яулауда булды, ә яңа килүчеләр өчен уңышка трамплин булуына ышанам», – диде ул.
Премьер-министр җиңүчеләрне котлады һәм бүләкләде, шулай ук Татарстанның бу вакыйганы алга таба да уздырырга әзерлеген белдерде.
«Без киләчәктә дә республикабыз кырларында җир эшкәртү буенча чемпионат кабул итәргә әзер. Шуңа күрә саубуллашмыйбыз, ә яңа очрашуларга кадәр дип әйтәбез», – диде ТР Хөкүмәте башлыгы.
Чемпионатта илнең 35 төбәгеннән, шулай ук Беларусь, Казахстан, Кыргызстан һәм Ираннан 65 механизатор катнашты. Иң яхшыларны ике дисциплина буенча ачыклаганнар: җир сукалау осталыгы һәм тракторны фигуралы йөртү. Беренче дисциплинада беренче урынны Татарстаннан Ирек Галиев, икенчелекне – Орел өлкәсеннән Виктор Кудинов, өченче урынны Мордовиядән Сергей Митрофанов алды. Трактор-шоуда Саратов өлкәсеннән Сергей Сергейчев җиңде. Икенче урында – Кемерово өлкәсеннән Алексей Филипов, өченчедә – Свердловск өлкәсеннән Андрей Савченко.
Ярышларны оештыручы, «Росагролизинг» генераль директоры Павел Косов республикага рәхмәт белдерде һәм ярышларны үткәрү дәрәҗәсен югары бәяләде.
