Бүген Зеленодольск районының Васильево бистәсендә «Дуслык» яңа модульле спорт залы ачылды. Тантанада Татарстан Республикасы Президенты Рөстәм Миңнеханов һәм Зеленодольск районы башлыгы Михаил Афанасьев катнашты.
Спорт объекты «Спорт — тормыш нормасы» илкүләм проекты кысаларында төзелгән. Залда мини-футбол, волейбол, баскетбол, җиңел атлетика белән шөгыльләнү өчен зоналар җиһазландырылган. Шулай ук көнчыгыш көрәшләренең төрле төрләре буенча секцияләр оештыру планлаштырыла.
Рөстәм Миңнеханов билгеләп үткәнчә, Татарстанда массакүләм спортны үстерүгә һәм киң куллану мөмкинлеген тәэмин итүгә зур игътибар бирелә. Заманча спорт корылмалары, шул исәптән җәяү барып җитү объектлары төзелә. Гомумән алганда, бүген республикада 11,6 мең спорт объекты бар, шуларның 354е Зеленодольск районында.
«Васильево — республикабызның иң матур урыннарының берсе. Шәһәр тибындагы бистә үзгәрә, аның кыяфәте, тормыш сыйфаты үзгәрә. Биредә спортка актив ярдәм итәләр, соңгы елларда берничә спорт объекты төзелгән. Бүген без яңа спорт залы ачабыз. Яшь спортчыларыбызга һәм аларның остазларына уңышлар телим», — дип өстәде республика Рәисе.
«Биредә яшьләр дә, өлкәннәр дә спорт белән шөгыльләнәчәк. Спорт залы тулып торыр дип ышанам, чөнки мондый объектка ихтыяҗ зур», — диде район башлыгы.
Аннары Рөстәм Миңнеханов спорт залын карады, яшь спортчылар һәм тренерлар белән аралашты. Яңа спорт объекты елына 244 мең кешегә исәпләнгән.
