Казанда Фән атнасы башланды. Спинлы (квант дөньясына хас термин) физика, химия һәм технологияләр өлкәсендә эшләүче, шулай ук үзләренең тикшеренүләрендә магнит резонансы ысулларыннан файдаланучы галимнәр өчен мөһим чараларның берсе бу. Анда катнашучыларны республика җитәкчелеге исеменнән Дәүләт Советы Рәисе, Татарстан Фәннәр академиясе академигы Фәрит Мөхәммәтшин сәламләде.
«Фән атнасын Казанның электрон парамагнит резонансы фәнни мәктәбе – Россия Фәннәр академиясенең структур подразделениесе – Завойский исемендәге Казан физик-техник институты оештыруын билгеләп үтү күңелдә зур канәгатьлек хисләре уята», – диде Фәрит Мөхәммәтшин, форумда катнашучыларга мөрәҗәгать итеп.
Дәүләт Советы Рәисе, Президент Владимир Путин Указы нигезендә, Россиядә 2022–2031 елларның – Фән һәм технологияләр унъеллыгы, ә Татарстанда 2024 елның республика Рәисе тарафыннан Татарстанның фәнни-технологик үсеш елы буларак игълан ителүен искәртте. «Әлеге башлангычны тормышка ашыруны бик мөһим эш дип саныйбыз һәм аңа барлык дәрәҗәләрдә ярдәм итәргә ниятлибез», – дип басым ясап әйтте ул.
Фәрит Мөхәммәтшин сүзләренә караганда, республикада фәнни өлкәгә төрлечә ярдәм күрсәтелә. Болар – грантлар һәм стипендияләр, фәнни премияләр, конкурслар, корпоратив программалар. «Мондый чараларга һәр ел саен 20 миллиард сумнан артыграк акча җәлеп ителә – җитди сан! Шуның нәтиҗәсе буларак, республика федерация субъектларының фәнни-технологик үсеш рейтингында лидерлар бишлегенә керә. Бу – Татарстандагы 13 мең галимнең (шуның 60 проценты чамасы – яшьләр) саллы уңышы. Бүген залда яшьләрне – булачак галимнәрне күрү аеруча зур шатлык хисләре уята. Нәкъ менә аларның фәнни эшчәнлеге Татарстан икътисадын үстерүдә гаять зур роль уйный. Яшь галимнәрнең яңа ачышларының тиз генә тормышка ашырылачагына һәм предприятиеләребездә кулланылачагына ышанам. Бу безгә, җитди санкцияләргә карамастан, көндәшлеккә сәләтне югалтмаска ярдәм итәчәк. Икътисадыбыз яңа фәнни эшләнмәләр нигезендә яңа биеклеккә күтәрелер, дип уйлыйм», – дип билгеләп үтте Дәүләт Советы Рәисе.
Фән атнасы Казанда 25–30 сентябрьдә үткәрелә. Аның кысасында Евгений Завойский исемендәге Халыкара премия (1991 елда Татарстан Хөкүмәте ярдәмендә гамәлгә куелды) тапшырылачак, шулай ук кайбер халыкара конференцияләр үткәреләчәк. Һәрбер конференциядә кимендә 150 кешенең: Россия төбәкләреннән, Азия һәм Европа илләреннән килгән зур белгечләр, яшь галимнәрнең катнашуы күздә тотыла.
Г.Сабырлык, күңел тынычлыгы Эльвирага. Бигрәк аяныч фаҗига.Эльвира Фазлыева кызы үлгәннән соң булган коточкыч хәлләр турында сөйләгән
