Россия Президенты Владимир Путин Гыйракның Хамданийя шәһәрендә туй вакытында янгын чыгуга бәйле кайгы уртаклашу телеграммасын җибәргән.
Кремльнең матбугат хезмәте Гыйрак Президенты Әбделлатыйф Рәшидкә һәм Премьер-министр Мөхәммәд Суданига юлланган телеграмманы бастырган.
“Хамданийя шәһәрендә бик күп корбаннарга китергән янгын очрагы буенча эчкерсез кайгы уртаклашуны кабул итегез. Фаҗиганең туй вакытында килеп чыгуы аеруча тетрәндерде”, – диелгән хәбәрдә.
Исегезгә төшерәбез: янгында 450 кеше һәлак булган һәм зыян күргән. Россия Президенты һәлак булганнарның туганнары һәм якыннарына түземлелек, ә зыян күрүчеләргә – тизрәк савыгуларын теләгән.
