Бүген Дәүләт Советында Яшьләр парламентының унберенче утырышы узды, анда яшь парламентарийлар РФ Хезмәт кодексына үзгәрешләр кертү буенча берничә инициативаны һәм Пенсияне вакытыннан алда билгеләү хокукы бирә торган вазыйфалар исемлеген карадылар, шулай ук республиканың кайбер предприятиеләрендә гамәлгә ашырыла торган экологик проектлар турында фикер алыштылар. Утырышны Яшьләр парламенты рәисе Нина Шимина үткәрде. Парламент эшендә Дәүләт Советының Социаль сәясәт комитеты рәисе Светлана Захарова һәм республика яшьләр эшләре министры Ринат Садыйков катнашты.
Парламент утырышының төп мәсьәләләренең берсе Россия Федерациясе Хезмәт кодексының 22 статьясына үзгәрешләр кертү инициативасы булды. Яшь парламентарийлар эш бирүчегә урнаштырыла торган вакансияләр турында дөрес мәгълүматны бастырып чыгару бурычын беркетүне кирәк дип саный.
Яшьләр парламентының хокукый мәсьәләләр, контроль һәм регламенты буенча комиссия әгъзасы Луиза Гәрәева билгеләп үткәнчә, еш кына эшнең реаль шартлары вакансияләргә туры килми, сүз, аерым алганда, график, хезмәт хакы дәрәҗәсе һәм башкалар турында бара.
Шул ук вакытта урнаштырылган вакансияләрдә дөрес булмаган мәгълүмат өчен эш бирүченең җаваплылыгы хезмәт килешүе дә, гамәлдәге законнарда да чагылыш тапмаган.
Яшь парламентарийлар шулай ук картлык буенча хезмәт пенсиясе вакытыннан алда билгеләнергә тиеш белгечлекләр исемлеген киңәйтү инициативасы белән чыкты. Алар анда югары мәктәп педагоглары вазыйфасын кертергә тәкъдим итәләр. Әлеге үзгәреш, яшь парламентарийлар фикеренчә, вуз укытучысы профессиясенең җәлеп итүчәнлеген арттырачак, бигрәк тә яшьләр өчен.
Бүген утырышта яңгыраган тагын бер инициатива — Дәүләт Советының Татарстан Республикасында гражданнарның сәламәтлеге торышы турындагы еллык докладын тыңлау.
