Татарстан төрле фәнни юнәлеш лидерларының берсе булып тора. Бу хакта Татарстан Фәннәр академиясе президенты Рифкать Миңнеханов Мәскәүдә Халык хуҗалыгы казанышлары күргәзмәсендә оештырылган «Россия» күргәзмә-форумында әйтте. Бүген биредә Фән һәм университетлар көне уза.
— Бу елның үзенчәлеге — фән һәм технологияләр унъеллыгының дәвам итүе, Россия Фәннәр академиясенең 300 еллыгы һәм Татарстанда фәнни-технологик үсеш елы. Мондый очраклар аз һәм башка булмаячак та, — дип искәртте Рифкать Миңнеханов.
Фәннәр академиясе президенты сүзләренчә, фәнни-технологик үсеш елының нәтиҗәсен күрү өчен Татарстанның билгеле бер эшләнмәләре бар.
— Бүген бу — иң мөһиме. Безнең алга куелган бурычлар тормышка ашырылачак. Татарстан өчен төп нигез — без төрле фәнни юнәлешләр лидерларының берсе булып торабыз. Илнең башка төбәкләре белән чагыштырганда, бездә яшь галимнәр күбрәк. Россиядә яшь галимнәр — 40 процент, бездә — 60 процент. Без тынычланмыйбыз, бүген аспирантурага басым ясыйбыз, — дип билгеләп узды Рифкать Миңнеханов. — 50 инженер мәктәбенең бишесе — Татарстанныкы. Университет стартап-студияләрендә акча бар, бизнес, вуз, предприятиеләрнең эше актив бара. Технологик эшмәкәрлеккә килгәндә, 442 җиңүче стартап, без аларны миллионерлар дип атыйбыз. Нигез бар. Быел сакларга, көчәйтергә һәм нәтиҗәгә ирешергә кирәк.
