Бүген республиканың медицина оешмалары гадәти режимда эшли. Хәзерге вакытта Татарстанда 11 ковид госпитале исәпләнә. Татарстан Сәламәтлек саклау министрлыгының штаттан тыш баш инфекционисты Дмитрий Лопушов «Татар-информ» агентлыгында узган матбугат конференциясендә шулай дип белдерде.
Дмитрий Лопушов әйтүенчә, хәзерге вакытта ковид госпитальләрендәге ятак урыннарның 30 проценты буш. «Бу начар күрсәткеч түгел. Ник дигәндә, моңа кадәр ятак урыннарның 4-5 проценты гына буш була иде», – диде ул.
Белгечләр талпаннар уянган чорга да әзер булырга киңәш итте. Әлегә республикада бер генә талпан кадалу очрагы да теркәлмәгән. «Талпаннар көннәр 1-2 градуска кадәр җылынгач уяна, 15 градуска кадәр җылыткач активлаша. Бүген талпан кадалу куркынычы зур булган 30 җирлек бар. Биредә эшләүчеләргә алдан хәстәрен күреп, талпанга каршы прививка ясатырга кирәк», – дип кисәтте Дмитрий Лопушов.
